TALA opomba ei ikahi nokulapela pomutue womulume ou. Omulume ou o Yesu. Ankho pahe una omanima 30. Omulume ou ekahi nae o João. Tuelilongesale katutu kombinga yae. Uhinangela etyi Maliya akatalelepo ombunga yae Elisabete, iya olukembe meimo lia Elisabete alulomboka nehambu? Olukembe luna, ankho o João. Anthi pahe, oityi João na Yesu vekahi nokulinga?

João ankho wanyingilisa Yesu momeva Ondongi yo Jordau. Omunthu ongotyo ena okumbatisalwa. Tete, una okunyingiliswa kohi yomeva, iya konyima apoluamo. Mokonda João ankho otyo alinga, alukwa okuti João Batista. Mahi, omokonda yatyi João ambatisalela Yesu?

João wambatisala Yesu mokonda oe weya okuita ku João emumbatisale. João ankho umbatisala ovanthu vahanda okulekesa okuti velivela ovipuka ovivi valinga. Mahi, okuti Yesu ankho walinga otyipuka tyimue otyivi pala okulivela? Au, Yesu kalingile otyipuka natyike otyivi, mokonda Omona wa Huku. Ngotyo, Yesu waita João emumbatisale mehunga limue lielikalela. Tutalei olipi ehunga olio.

Puetyi Yesu nkhele eheneye ku João, ankho okalupindelu. Okalupindelu omunthu wokuhonga omavai pala okulinga onomesa, novipundi. Jose omulume wa Maliya ankho omuhongi womavai iya alongesa Yesu, nae akale omuhongi womavai. Mahi, Yehova ankho katumine Omona wae pano pohi opo akale omuhongi womavai. Yehova ankho uhanda Yesu alinge otyilinga tyimue tyakolela. Iya ankho pahe omuvo wokuhimbika okulinga otyilinga otyo wehikapo. Ngotyo, opo Yesu alekese okuti wafuapo pala okulinga ehando lia Tate yae, waita ku João emumbatisale. Okuti Huku wahambukilue?

Enga, wahambukilue, mokonda etyi Yesu atunda momeva, kuatunda ondaka imue keulu yati: ‘Ou, Omona wange, una ame napanda.’ Tupu eulu alilingi ngoti lieliikula iya akutundu opomba ei ilaukila ku Yesu. Oyo imoneka ngoti opomba, mahi hapombako yotyili. Ospilitu sandu ya Huku.

Yesu ankho pahe una ovipuka ovinyingi pala okusoka. Moluotyo, waya pomphangu imue aike, oku akakalele ononthiki 40. Oko Satanasi emuvasa. Ovikando vitatu Satanasi waovola okukengelela Yesu opo alinge otyipuka tyimue tyapenga komaiho a Huku. Mahi Yesu ketavelele.

Konyima yotyo, Yesu wakondoka iya ahonyena novalume vamue, avakala ovalanduli vae ine ovalongwa vae votete. Ankho vatiwa o Andre, o Petulu (tupu ankho utiwa o Simau), na Filipe, na Natanael (tupu ankho utiwa o Mbatolomeu). Yesu no valongwa ovo ovape avaende ko Galileia. Mo Galileia avakala mepundaumbo lia Natanael mo Kanaa. Oko, Yesu aende kotyipito tyimue otyinene tyo kasamendo, iya alingi ehuviso liae liotete. Utyii ehuviso patyi alingile? Omeva weepilulula ovinyu.