HYANDI nuni palomä yꞌo ri gäi ha rä ñäxu nuni ñꞌo̱ho̱. Gehni rä Hesu, nubye̱ ya pe̱ꞌtsi ngu 30 yä je̱ya. ꞌNe nuni mänꞌa ñꞌo̱ho̱ gi handi, rä thuhu Juan. Ya dä pädihu̱ nꞌa tu̱i de gehni. ¿Gi beni ge nuꞌmu̱ Märia bi ma bä nuu Elisabet, näꞌä ꞌue̱ne mi o ha rä mu̱i Elisabet bi nsagi ko rä johya? Näꞌä ꞌue̱ne mi to̱ꞌmi Elisabet go mi geꞌä Juan. Pe xibye̱, ¿te pe̱fi Juan ꞌne rä Hesu?

Juan bi ku̱ꞌmi rä Hesu ha rä däthe Jordan. Njabu̱ di nku̱ꞌmdehe nꞌa rä jäꞌi. Di ku̱ꞌmi gatꞌho rä ndoyꞌo ha yä dehe, ꞌnepu̱ po̱ni mänꞌaki de rä dehe. Juan mi fatsꞌi yä jäꞌi pa mi nku̱ꞌmdehe hänge bi tꞌembi Juan Bautista. Pe ¿por hanja bi matsꞌi rä Hesu pa bi nku̱ꞌmdehe?

Bi jabu̱ ngeꞌä rä Hesu bi yꞌapi Juan ge xä ku̱ꞌmi ha yä dehe. Pe, ¿toꞌo mi nku̱ꞌmdehe? Nuꞌu̱ yä jäꞌi xki yobri de nuꞌu̱ yä tsꞌoki xki yꞌo̱tꞌe. Pe, xi rä Hesu, ¿mi japä mꞌe̱di dä yobri ngeꞌä xki yꞌo̱tꞌe yä tsꞌoki? Hinä, rä Hesu nunka bi me̱fi yä tsꞌoki, ngeꞌä mi rä Tꞌu̱ Äjuä xki ꞌñehe de mähetsꞌi. Hänge rä Hesu mi pe̱ꞌtsi mänꞌa raso pa bi yꞌapäbi Juan ge xä matsꞌi xä nku̱ꞌmdehe. Ma gä handihu̱ te mä rasoꞌä.

Rä Hesu mi mpe̱fi de gä yaxi änte de xä nku̱ꞌmdehe. Tꞌembi yä yaxi nuꞌu̱ yä jäꞌi hoki yä mexa, yä thuhni, ꞌne märꞌa yä tꞌo̱tꞌe de gä zaa. Jose, näꞌä rä däme Märia mi mpe̱fi de gä yaxi hänge bi ꞌñuti ꞌnehe rä Hesu. Pe Äjuä himbä pe̱hni rä Tꞌu̱ ha rä Xiꞌmhai pa xä mpe̱fi de gä yaxi. Äjuä mi pe̱ꞌtsi nꞌa däta ꞌme̱fi pa rä Hesu ꞌne ya xki zo̱ho̱ rä ora pa geꞌä. Hänge pa bi ꞌñudi ge nubye̱ ma dä me̱päbi rä bolunta rä Dada, rä Hesu bi yꞌapäbi Juan ge xä matsꞌi xä nku̱ꞌmdehe. ¿Bi ho Äjuä näꞌä bi me̱fi rä Hesu?

Hää xa bi ho, hänge mi bo̱ni rä Hesu de ha yä dehe, Äjuä bi ñä dende mähetsꞌi ꞌne bi ꞌñenä: “Nuni, go gehni mä Tꞌu̱ xa di mädi”. ꞌNehe, ꞌñenä ngu bi xogi mähetsꞌi ꞌne bi gäi nꞌa palomä pa habu̱ mi ꞌmai rä Hesu. Pe hingä mi nꞌa palomä. Mi geꞌä rä mäkä tsꞌe̱di Äjuä.

Nubye̱ rä Hesu mi pe̱ꞌtsi te dä ntso̱ꞌmi ndunthi, hänge bi mase̱ ha nꞌa luga po 40 yä pa. Ja gehni rä Zithu bi ma bä tsu̱di rä Hesu. Po hñuꞌki rä Zithu, mi ne xä japäbi rä Hesu xä ꞌuengi de rä ꞌñuu Äjuä. Pe rä Hesu xa bi ze̱tätho.

Mꞌe̱fa, rä Hesu bi mengi ꞌne bi bädi rꞌa yä ñꞌo̱ho̱ nuꞌu̱ bi zo̱ho̱ bi yꞌo̱tꞌe yä de̱ni. Rꞌa de geꞌu̱ mi yä thuhu: Andres, Pedro (ꞌnehe mi tꞌembi Simon), Felipe ꞌne Natanael (ꞌnehe mi tꞌembi Bartolome). Rä Hesu ꞌne nuyu̱ yä ñꞌo̱ho̱ bi ma pa ha Galilea, ꞌne bi ntsaya ha Kanä, ha rä hnini Natanael. Ja gehni rä Hesu bi ntini ha nꞌa nthäti, ꞌne bi ja näꞌä rä mu̱di milagro. ¿Gi pädi te mä milagroꞌä? Bi japi bi mbinu rä dehe.