KAUST du de Duw seenen, waut doa raufkjemt opp dän Maun sienen Kopp nopp? Dis Maun es Jesus. Hee es nu ojjefäa 30 Joa oolt. De aundra Maun es Johanes. Von dän hab wie ea aul waut jeläst. Kaun die daut noch denkjen, daut Elisabet äa Bäbe en äaren Buck fa Freid hupst, aus Maria no ar kjeem? Daut Bäbe wia Johanes. Oba waut doonen Johanes un Jesus hia nu?

Johanes haft Jesus jroz em Jordan Riefa unjajedukt. Soo woat eena jedeept. Ieescht woat eena em Wota unjajedukt un dan wada rutjehowen. Johanes deed väl Menschen deepen, un doawäajen wort hee Johanes de Deepa jenant. Oba wuarom deed Johanes Jesus deepen?

Hee deed daut, wiels Jesus kjeem un am doano fruach. Jeweenlich leeten de Menschen sikj von Johanes deepen toom wiesen, daut an daut schlajchte, waut see jedonen hauden, leet wia. Oba haud Jesus jeemols waut schlajchtet jedonen? Nä, kjeenmol, wiels hee wia je Gott sien ieejna Sän vom Himmel. Jesus wull sikj wäajens waut aundret deepen loten. Well wie mol seenen, wäajens waut.

Ea Jesus no Johanes kjeem, wia hee een Descha. Een Descha es eena, dee Sachen von Holt moakt, soo aus Deschen, Steela un Benkjen. Maria äa Maun Josef wia een Descha un haud Jesus daut deschren biejebrocht. Oba Jehova haud sienen Sän nich no de Ieed jeschekjt toom deschren. Hee haud am waut besondret oppjejäft, un nu wia fa Jesus de Tiet jekomen, doamet auntofangen. Toom wiesen, daut hee von nu aun bloos noch daut doonen wull, wuatoo sien Voda am jeschekjt haud, leet hee sikj von Johanes deepen. Jleefst du nich, Gott freid sikj doaräwa?

Jo, hee deed. Aus Jesus ieescht utem Wota rutkjeem, säd eene Stemm vom Himmel: ‘Dit es mien Sän, äwa dän ekj mie sea freien doo.’ Daut scheen uk soo, aus wan de Himmel opjinkj, un doa kjeem eene Duw rauf no Jesus. Oba daut wia nich opp iernst eene Duw. Daut leet bloos soo. En Werkjlichkjeit wia daut Gott sien heilja Jeist.

No dit haud Jesus väl toom nodenkjen. Doawäajen jinkj hee fa 40 Doag no eene Städ, wua hee gaunz auleen wia. Dort kjeem de Soton no am. Dree Mol wull Soton Jesus äwaräden, waut orrajchtet to doonen. Oba Jesus deed daut nich.

Nodäm jinkj Jesus trigj un bejäajend eenje Mana, waut siene ieeschte Nofolja, ooda Jinja worden. Daut wieren Andreas, Petrus (dee wort uk Simon jenant), Filippus un Natanael (dee uk Bartolomäus jenant wort). Jesus jinkj met siene Jinja toop no Galiläa. Dort bleewen see een Stootje en de Staut Kana, wua Natanael tus jehieed. En Kana jinkj Jesus no eene groote Kjast un deed doa sien ieeschtet Wunda. Weetst du, waut hee deed? Hee muak Wota to Wien.