CHAWILAMPEʼ ri jun palomax tijan kqaj lo pa ujolom ri jun achi. Wajun achi riʼ are Jesús. Kimik weneʼ kʼo 30 ujunabʼ. Ri kʼo rukʼ are Juan. Xqetaʼmaj jubʼiqʼ chirij. ¿La xsach ta pa ajolom chiʼ María xbʼe che rilik ri ufamiliar ubʼiʼ Elisabet, xuqujeʼ chiʼ ri uneʼ majaʼ kkʼejeʼik sibʼalaj xkikotik? Ri neʼ are ri Juan. Tekʼuriʼ, ¿su tijan kkebʼan Juan rukʼ Jesús kimik?

Juan xuqasaj ri Jesús pa ri nimalaj jaʼ ubʼiʼ Jordán. Jelaʼ kbʼan che jun winaq chiʼ kbʼan uqasanjaʼ. Kqasax ri winaq pa ri jaʼ, tekʼuriʼ kesax loq. Juan kubʼan wariʼ chike ri winaq; rumal laʼ kbʼix Juan Bautista che. Tekʼuriʼ, ¿suche ri Juan xuqasaj pa jaʼ ri Jesús?

Ri Juan xubʼan wariʼ rumal che xpe ri Jesús xuta che, che kbʼan ri uqasanjaʼ. Juan kubʼan kiqasanjaʼ ri winaq che kʼäx kkenaʼ che kibʼanom kimak. Tekʼuriʼ, ¿la xa xubʼan jun umak ri Jesús che kʼäx kunaʼo? Je täj, Jesús xubʼan ta wariʼ, rumal che are Ukʼojol ri Ajawaxel che xtaq lo cho ruwäch Ulew. Rumal laʼ, kʼo jun chik suche xraj ri Jesús che xbʼan uqasanjaʼ. Chqilampeʼ sulaʼ.

Chiʼ Jesús majaʼ kpe rukʼ ri Juan, ri Jesús are ajanel. Jun ajanel kubʼan täq jastaq rukʼ cheʼ, kubʼan tem, kubʼan mesas xuqujeʼ nikʼaj chik. José, ri rachajil ri María, ajanel, are xukʼut chuwäch ri Jesús. Ri Ajawaxel xutaq ta lo ri Ukʼojol rech kubʼan ajanel cho ruwäch Ulew. Kʼo jun uchak nim ubʼantajik, xuqujeʼ xopan ri qʼij che wariʼ. Rumal laʼ rukʼ ri uqasanjaʼ ri Jesús xukʼutu che xpe che ubʼanik su kraj ri Utat, Jesús xuta che Juan che kubʼan uqasanjaʼ. ¿La utz xril wariʼ ri Ajawaxel?

Jeʼ, rumal che, chiʼ ri Jesús xel lo pa ri jaʼ, jun chʼabʼal pa ri kaj xubʼij wariʼ: ‹Are waʼ ri Nukʼojol ri utz kinwilo›. Xuqujeʼ kkaʼyik che ri kaj xujaq ribʼ, o xutor ribʼ, tekʼuriʼ wajun palomax xqaj lo pa ujolom ri Jesús. Wariʼ qastzij täj che jun palomax, xaq xiw pachaʼ kkaʼyik. Are ri rixlabʼixel ri Ajawaxel.

Kimik ri Jesús rajawaxik kchoman chirij kʼi täq jastaq, rumal laʼ xbʼe pa jun lugar jachiʼ kʼo ta nijun pa 40 qʼij. Chilaʼ Satanás xpe rukʼ. Oxibʼ mul ri Satanás xraj xubʼan che Jesús che kniman ta che ri täq utaqonik ri Ajawaxel. Tekʼuriʼ ri Jesús xubʼan ta wariʼ.

Tekʼuriʼ, Jesús xtzalij loq tekʼuriʼ xretaʼmaj kiwäch nikʼaj achijabʼ che xkebʼan unabʼe täq ajtijoxelabʼ. Nikʼaj chike are: Andrés, Pedro (xuqujeʼ kbʼix Simón che), Felipe xuqujeʼ Natanael (xuqujeʼ kbʼix Bartolomeo che). Ri Jesús xuqujeʼ wa täq achijabʼ xebʼe pa ri Galilea. Chilaʼ xekanaj kan pa ri utinamit Natanael, ubʼiʼ Caná, jelaʼ, pa täq jujun täq kʼulunem, ri Jesús xubʼan ri nabʼe milagro. ¿La awetaʼm sulaʼ? Xubʼan vino che ri jaʼ.