QAWAY chay palomaqa runapa umanman uraykamuchkan. Chay runaqa Jesusmi. Chaypiqa 30 watanpiñam kachkan. Ladonpi kaqñataq Juan sutiyoq runam. Paymantaqa tumpallatapas yacharunchikña. ¿Yuyachkankichu Mariaqa ayllun Elisabetta watukuptin, Elisabetpa wiksanpi wawan kuyuriruspa kusikusqanta? Chay manaraq nacesqa wawaqa Juanmi karqa. Ichaqa ¿imatam Juanqa chaynataq Jesuspas rurachkanku?

Jordan mayupim Bautizaq Juanqa Jesusta challpururqa. Chaynatamá bautizana karqa. Runata yakupi challpuykachispa horqoykunam. Juanmi runakunata chaynata ruraqmi karqa; chaymi Bautizaq Juan nispa suticharurqaku. Hinaptinqa ¿imanasqamá Jesustaqa bautizarun?

Kikin Jesusmi hamurqa Bautizaq Juanman hinaspa mañakurqa bautizaykunanpaq. Mana allinta rurasqankumanta reqsipakuspa wanakuqkunallatam Juanqa bautizarqa. Ichaqa ¿imatapas Jesusqa ruranmanchu karqa chaymanta wanakunanpaq? Hanaq pachamanta Diospa kachamusqan Churin kaspanmi manam haykapipas Jesusqa huchallikurqachu. Chayna kaptinpas, Juanta mañakurqa bautizaykunanpaq. Qawasunchikyá imamanta bautizachikurqa.

Juanman manaraq Jesus richkaspanmi carpintero karqa. Carpinteroqa kullumantam mesata, sillata, bancata chaynataq imatapas ruraqmi. Mariapa qosan Joseymi carpintero kaspan Jesustapas yachachirqa chaynalla kananpaq. Diosmi ichaqa Churinta Allpaman kachamurqa manam carpintero kananpaqchu. Jesuspaqqa sapaqchasqañam rurananqa karqa, hinaptin chayta rurananñam karqa. Chaymi Diospa munasqanta rurananpaq hamusqanta qawachinanpaqmi Jesusqa bautizarachikunanpaq Juanta mañakurqa. ¿Kusichinmanchu karqa Diosta chay rurasqanqa?

Diospa agradonpaqmi karqa, chaymi yakumanta lloqsiramuptin hanaq pachamanta qonqayta nimurqa: ‘Paymi kuyasqay Churiy’ nispa. Hinaptinmi hanaq pacha qonqayta kicharikuykurqa hinaspanmi chay palomaqa Jesusman uraykamurqa. Ichaqa manamá cheqap palomachu rikchakuyllam rikchakun. Chayqa Diospa chuya espiritunmi karqa.

Chaymantaqa achkapim Jesuspaqqa yuyaymananan kachkan, chaymi 40 punchaw sapallan mana runapa kasqan purunman pasakurqa. Chaypim Satanasqa Jesusman asuykuspan kimsa kutikama hikutarqa Diospa kamachikuyninkunata qepancharunanpaq. Jesusñataqmi ichaqa manam chaynataqa rurarqachu.

Chaymantam, Jesusqa kutiramuspa runakunata reqsirurqa, paykunam karqaku punta kaq discipulonkuna. Paykunaqa karqaku: Andres, Pedro, Felipe hinaspa Natanael; Pedrotaqa Simon nispa sutichaqku Natanaeltapas Bartolome nispa sutichaqku. Hinaptinmi Jesuswan paykunaqa Galilea lawman pasakurqaku. Hinaspanmi Natanaelpa llaqtan Galilea law Cana llaqtaman chayaruptinku casamientoqa karqa chaypim punta kaq milagrotam Jesus rurarqa. ¿Yachankichu imataq karqa? Yakutam vinoyarachirqa.