UYALIBONA yini lelituba lelehlela enhloko yalendvodza? Lendvodza nguJesu. Sewuneminyaka lecishe ibengu-30 budzala. Kantsi lendvodza lanayo nguJohane futsi sesifundze lokutsite ngayo. Usakhumbula ngesikhatsi Mariya avakashela Elizabethe, futsi umntfwana esiswini sakhe agcuma ngenca yenjabulo? Lomntfwana kwakunguJohane. Kepha yini boJohane naJesu labayentako lapha?

Johane usandza kucwilisa Jesu eMfuleni iJordane. Lena yindlela umuntfu labhajatiswa ngayo. Ucala ngekucwiliswa emantini, bese uyakhishwa. Ngenca yekutsi abebhabhatisa bantfu, ubitwa ngekutsi nguJohane umBhabhatisi. Kepha kungani Johane abhabhatise Jesu?

Johane wakwenta loku ngoba acelwe nguJesu. Abebhabhatisa bantfu labakhombisa kutisola ngetintfo letimbi labebatentile. Kepha kukhona yini lokubi Jesu lakwenta kuze atisole ngako? Kute, ngoba abeyiNdvodzana yaNkulunkulu levela ezulwini. Ngako-ke wacela Johane kutsi ambhabhatise ngenca yesizatfu lesehlukile. Ase sibone kutsi sasiyini leso sizatfu.

Jesu abengumbati ngesikhatsi asengaketi lapha kuJohane. Umbati ngumuntfu losebentisa sigodvo ekwenteni tintfo letinjengematafula, titulo kanye nemabhentji. Josefa naye abengumbati, futsi wafundzisa Jesu lowomsebenti. Kepha Jehova abengakayitfumeli iNdvodzana yakhe emhlabeni kutsi itewuba ngumbati. Abeyitfumele kutewukwenta umsebenti lobalulekile, futsi sikhatsi sekutsi yente lowomsebenti besesifikile. Kute akhombise kutsi utele kutewukwenta intsandvo yaNkulunkulu, Jesu wacela Johane kutsi ambhabhatise. Nkulunkulu kwamjabulisa yini loko?

Yebo, kwamjabulisa, ngoba ngemuva kwekuphuma kwaJesu emantini, kwevakala livi ezulwini litsi: ‘Lena yiNdvodzana yami lengijabulako ngayo.’ Kubonakala shengatsi lizulu lavuleka, kwase kubonakala lelituba lehlela kuJesu. Kepha kwakungasilo lituba mbamba. Limane libukeka njengalo. Empeleni kwakungumoya longcwele waNkulukulu.

Kwakunalokunyenti lobekusafanele Jesu acabange ngako, ngako-ke waya endzaweni lethulile futsi wahlala khona emalanga langu-40. Lapho-ke kwase kufika Sathane, futsi katsatfu wetama kumlinga kutsi ente lokuphambene nemtsetfo waNkulunkulu. Kodvwa Jesu akavumanga kukwenta.

Ngemuva kwaloko, Jesu wabuyela emuva futsi wase utfola emadvodza laba bafundzi bakhe bekucala. Labanye babo bekubo; Andreya, Phetro (lebekabitwa ngekutsi nguSimoni), Filiphu kanye naNathanayeli (labebitwa ngekutsi nguBathalomewu). Jesu wase uyesuka kanye nalabafundzi bakhe uya esifundzeni saseGalile. Lapha eGalile befika bahlala eKhana edolobheni lakubo Nathanayeli. Lapho Jesu waya edzilini lemshado, futsi wenta simangaliso sakhe sekucala. Uyati kutsi sasiyini? Wagucula emanti aba liwayini.