DORA eriiba niriija ha mutwe gw’omusaija. Omusaija onu nuwe Yesu. Hati aine haihi emyaka 30 ey’obukuru. Omusaija owali nawe nuwe Yohana. Tukegaho ebimu ebirikumukwataho. Noijuka Malyamu obu yagenzere kubungira omunyabuzale we Erisabesi, kandi nkoku omwana omunda ya Erisabesi yagurukire n’okusemererwa? Omwana ogu owakaba atakazairwe akaba ali Yohana. Baitu hati Yohana na Yesu nibakora ki?

Yohana yakamara kwibika Yesu omumaizi g’Ekisaaru kya Yorudani. Nigwo mulingo omuntu abatizibwamu. Okubanza aibikwa mumaizi, hanyuma naihwamu. Habw’okuba Yohana nakora kinu, nikyo yayetwaga Yohana Omubatizi. Baitu habwaki Yohana yabatiize Yesu?

Mali Yohana akakora kinu habwokuba Yesu akaija kandi yasaba Yohana amubatize. Yohana yabatizaga abantu abakugonza kwoleka ngu begarukiremu habw’ebikorwa ebibi ebi bakaba bakozere. Yesu akaba aine ebikorwa ebibi eby’okwegarukamu? Nangwa, habw’okuba nuwe Mwana wa Ruhanga eyarugire mw’iguru. Kale akasaba Yohana amubatize habw’ensonga ey’embaganiza. Katurore ensonga egyo niyo eraha?

Yesu atakaizire hanu owa Yohana, akaba ali mubaizi. Omubaizi nuwe omuntu akora ebintu nk’emeza n’entebe kuruga mumbaho. Yusufu, iba Malyamu akaba ali mubaizi kandi akegesa Yesu kuba nkawe. Baitu Yahwe atatume Omwana we kwija omu nsi kuba omubaizi. Akaba amwiniire omulimo ogw’embaganiza, kandi obwire hati buhikire Yesu okuhikiriza omulimo ogu. Kale nu, okwoleka nti hati aizire kukora Ise by’agonza, Yesu asaba Yohana amubatize. Kinu Ruhanga akakisiima?

Ego, habw’okuba obu yamazire okuruga omumaizi ati, iraka likaruga omu iguru lyagamba: ‘Onu nuwe Mwana wange, ou nsemererwa.’ Kandi kikasisana nti iguru likakingurwa kandi eriiba lyaija hali Yesu. Baitu tiriri eriiba lyonyini. Likaba nirisisana busana nkalyo. Mananu, gwali mwoyo gwa Ruhanga ogurukwera.

Hati, Yesu aine bingi eby’okutekerezaho. Nikyo yagendiire mu mukiikaro nambere akaba nasobora kuba wenka kumara ebiro 40. Oku Setani akamwizira. Emirundi esatu Setani akalengaho kuletera Yesu kukora ekirukucwa ebiragiro bya Ruhanga. Baitu Yesu tasobora kukikora.

Hanyuma yebyo, Yesu agarukayo, kandi atangana abasaija abaafookere bakurasi be rundi abegesebwa be ab’okubanza. Amabara g’abamu nigo Andereya, Petero (obundi ayetwa Simoni), Firipo na Nasaneri (obundi ayetwa Batoromayo). Yesu n’abegeswa be abahyaka bagenda mu kicweka kya Galiraya. Mu Galiraya baikarayo kake mu Kana, orubuga oru Nasaneri nambere akaba naruga. Oku Yesu agenda ha bugenyi bw’amaani obw’okuswerwa, kandi akora ekyamahano kye eky’okubanza. Omanyire nikiha? Ahindura amaizi agafoora amaarwa.