КӨР ДААН! Бо кижиниң бажынче көге-буга олуруптур. Ол дээрге Иисус-тур. Ам ол 30 хире харлыг. Ооң чанында Иоа́нн тур. Мария төрели Елисаве́тага аалдап чеде бээрге, Елисаве́таның иштинде төлү өөрээш шимчеп эгелээнин, сактыр сен бе? Ол дээрге ынчан төрүттүнмээн Иоа́нн турган. А ам Иисус биле Иоа́нн чүнү канчап турары ол?

Иоа́нн чаа-ла Иисусту Иорда́н хемниң суунче суккаш, уштуп эккелгени ол. Кижиниң сугга суктурары мынчаар эртер. Баштай ону сугже сугар, оон уштуп эккээр. Иоа́нн чонну сугга суп турар боорга, ону Сугга Сугар Иоанн деп адаар. Ынчаарга Иоа́нн Иисусту чүге сугга суп турарыл?

Иисус боду келгеш, ону ол дугайында дилээн. Иоа́нн ооң мурнунда шын эвес кылган чоруктары дээш буруузун миннип шынзыдарын күзеп турар кижилерни сугга суп турар. Ынчалза-даа Иисус буруузун миннир хире бир-ле багай чүүл кылган бе? Чок — кажан-даа кылбаан, чүге дээрге ол дээрден келген, Бурганның бодунуң Оглу-дур. Ынчап кээрге Иисус Иоа́нндан өске чылдагаан-биле ону сугга сугарын дилээн. Ол чүү деп чылдагааныл, билип алыылам, че.

Ооң мурнунда Иисус чазаныкчы турган. Чазаныкчы дээрге ыяштан янзы-бүрү херекселдер кылыр кижи-дир, чижээлээрге: сандайлар, столдар дээн ышкаш. Марияның ашаа, Иосиф, чазаныкчы турган, ынчангаш Иисусту ол ажылга база өөредип каан. Ынчалза-даа Иегова Иисусту черже, ол чазаныкчы болзун дээш чорутпаан. Ол Иисуска тускай ажыл дагзып каан, ам ону күүседир үе келген. Иисус Бурганның күзелин күүседир дээш келгенин, Иоа́ннга ону сугга сугар кылдыр дилээни-биле көргүскен. Бурганга ол чүүл таарымчалыг болган бе?

Ынчанмайн канчаар — чүге дизе ол сугдан үнүп кээрге, дээрден үн дыңналган: ‘Бо мээң Оглум-дур, ол меңээ таарымчалыг’. Дээр ажыттынып келген ышкаш, а Иисустуң кырынга көге-буга олурупкан. Ол ылап шын көге-буга эвес. Ол чүгле ынчаар көстүп турар. Херек кырында ол Бурганның ыдыктыг сүлдези-дир.

Ам Иисуска хөй чүүлдер дугайында боданыр херек, ынчангаш ол 40 хонук иштинде ээн черже чорупкан. Ол черге Эрлик аңаа чоокшулап келген. Үш катап Эрлик Иисусту, бир-ле чүүлге Бурганның хоойлуларын үрээр кылдыр, албадаарын кызыткан. Ынчалза-даа Иисус чүү дээш-даа ону кылырын күзевейн турар.

Ооң соонда Иисус эглип келгеш, каш кижиге ужуражып келген, олар ооң бирги талалакчылары — ооң өөреникчилери апарган. Чамдыызының аттары бо: Андре́й, Пётр (оон өскээр Си́мон деп адаар), Фили́пп база Нафанаи́л (оон өскээр Варфоломе́й дээр). Иисус чаа өөреникчилери-биле кады Галиле́яның девискээринче чорупкан. Галиле́яга олар, Нафанаи́лдиң төрээн хоорайы — Канага доктапкан. Маңаа Иисус бир улуг кудага келгеш, бодунуң бирги хуулгаазынын кылган. Билир сен бе, кандыг? Сугну арага кылдыр хуулдурупкан.