Tantara 88

Jaona Nan̈ano Batisa Jesosy

ZAHAVA pizin̈y an̈abo lohan’ny lelahy io. Jesosy lelahy io. Izy tamin’io kadiriny 30 taon̈o. Jaona lelahy ankilany io. Atsika efa nianatra raha maomba izy. Azonao onon̈o tamy Maria namangy Elizabeta, tsaiky tan̈aty kibon’Elizabeta nihetsiky, fôtony ravoravo in̈y? Izin̈y Jaona mbala tan̈aty kibo. Man̈ino fo Jaona ndreky Jesosy iô?

Jaona iô vo boaka nan̈ajibiky Jesosy tan̈aty Ten̈aranon’i Jordana. Karaha io olo atao batisa zen̈y. Izy antsendriky ajibiky an̈aty rano, baka iô aboaka. Jaona nan̈ano batisa olo maro, ke Jaona Mpan̈ano Batisa nikahian̈a izy. Nan̈ino fo Jaona nan̈ano batisa Jesosy?

Jaona nan̈ano batisa izy, fôtony Jesosy nan̈iraka izy. Jaona nan̈ano batisa olo, ahitan̈a fa irô nanen̈iny nan̈ano raha ratsy. Jesosy ma efa navy nan̈ano raha ratsy, ke nanen̈iny? Jesosy tsiary nan̈ano zen̈y, fôtony izy Zanaka Zan̈ahary boaka an-dan̈itry an̈y. Nisy antony hafa nan̈irahany Jaona han̈ano batisa izy. Alô zahavatsika zen̈y.

Mpandrafitry asan’i Jesosy talohan’izy navy tamy Jaona io. Mpandrafitry zen̈y, olo mpan̈amboatra latabatra ndreky sezy kakazo. Mpandrafitry Josefa vadin’i Maria, ke Jesosy nampianariny, nanjary mpandrafitry koa. Tsy han̈ano mpandrafitry nan̈irahan’i Jehovah Zanany tambony tany teto. Asa hafa nirahiny ataony, ke Jesosy iziô han̈ano asa zen̈y. Jesosy amy zay nan̈iraka Jaona han̈ano batisa izy, han̈aboahan̈a fa izy vôn̈ono han̈ano sitrapôn’ny Babany. Ravoravo edy Zan̈ahary tamy zen̈y?

Ia, fôtony Jesosy koa fa niboaka boaka tan̈aty rano, nisy fiô boaka tan-dan̈itry nivolan̈a: ‘Ty Zanako tiako.’ Tamy zen̈y koa lan̈itry karaha nibian̈a, baka iô pizin̈y io nijotso tamy Jesosy. Fa izio tsy pizin̈y ankitikitin̈y, fa sarisariny fo. Izio fan̈ahy masin̈in’ny Zan̈ahary.

Maro raha mila iritriretin’i Jesosy, ke izy nandeha tamy tany tsisy olo tan̈atin’ny 40 andra. Satana navy taminany tan̈y. Intelo aby Satana nan̈iraka Jesosy tsy han̈araka lalàn̈an’ny Zan̈ahary. Jesosy tsy nety nan̈ano zen̈y.

Jesosy amy zay koa fa niala tiô, fanôjy lelahy maromaro. Irô io nanjary voanalohany tamy mpan̈araka izy, na mpianatranany. Andrea, Petera (na Simona), Filipo ndreky Natanaela (na Bartolomeo) an̈aran̈a mpianatranany sasany. Jesosy ndreky mpianatranany vaovao io nandeha tamy tanàna man̈odidin̈y Galilia. Irô koa fa navy ta Galilia, nidôko ta Kana, tany nahatombo Natanaela. Tan̈y Jesosy nan̈aton̈o mariazy naresaka, baka iô nan̈ano fahagagan̈a voanalohany. Ino zen̈y koa hainao? Rano nivoany divay.

Matio 3:13-17; 4:1-11; 13:55; Marka 6:3; Jaona 1:29-51; 2:1-12.