ALOLE ngunda jajikutula pamtwe pa mundujo. Mundujo ali Yesu. Sambano akwete yaka ciŵandika 30. Mundu jwali najojo ali Yohane. Tulijiganyisye yine panandi yakwamba jwalakweju. Ana akukumbucila kuti Maliya paŵapite kukuwonegana ni m’balegwe Elisabeti, mwanace juŵaliji m’matumbo mwa Elisabeti ŵawulukwite mwakusangalala? Mwanace juŵaliji mkanapagwejo ŵaliji Yohane. Ana sambano Yohane ni Yesuju akutenda cici?

Yohane agambile kumtiŵisya kwene Yesu m’mesi ga mu Lusulo lwa Yolodani. Keleka kali kabatiswe ka mundu. Candanda, akusamtiŵisya m’mesi, kaneko ni kumcuwula. Ligongo lyakuti Yohane akusatenda yeleyi kwa ŵandu, jwalakwe akukolanjikwa kuti Yohane M’batisa. Nambo ligongo cici Yohane akum’batisa Yesu?

Yohane ŵam’batise Yesu ligongo lyakuti Yesujo ŵatesile kum’ŵenda kuti abatiswe ni jwalakwe. Yohane ŵabatisyaga ŵandu ŵaŵalosyaga kuti akulitendela canasa ligongo lya yakusakala yatesile. Ana nambo Yesu ŵatesilepo cindu cakusakala caŵasosekwaga kulitendela canasa? Iyayi, Yesu nganatendepo, ligongo jwalakwe ali Mwanace jusyesyene jwa Mlungu juŵatyocele kwinani. Sambano jwalakwe ŵam’ŵendile Yohane kuti abatiswe paligongo line. Kwende tulole ligongo lyakwe.

Yesu mkanayice kwa Yohane, ŵaliji jwakupala matabwa. Jwakupala matabwa akusaŵa mundu jwakusapanganya yindu kutyocela ku matabwa, mpela matebulo, mipando, soni mabenci. Yusufu ŵamkwakwe Maliya ŵaliji ŵakupala matabwa, Yesu nombenajo ŵamjiganyisye kuŵa jwakupala matabwa. Nambo Yehofa nganamtumisya mwanagwe pacilambo capasi kukuŵa jwakupala matabwa. Jwalakwe ŵakwete masengo gakusosekwa mnope gakuti Yesu agatende, ni sambano ndaŵi jakwanile jakuti Yesu atande masengogo. Sambano pakulosya kuti jwalakwe ayice kukutenda lisosa lya Atatigwe, Yesu akum’ŵenda Yohane kuti abatiswe. Ana Mlungu akusangalala nayo yeleyi?

Elo, akusangalala, ligongo Yesu pagambile kucuwuka m’mesi, maloŵe gakupikanika kutyocela kwinani gakuti: ‘Aju ali mwanangu, jwangusamnonyela.’ Yikuwonekasoni kuti kwinani kuwugwice ni ngundaji jikutula pa Yesu. Nambo nganijiŵa ngunda jisyesyene. Jikwamba kuwoneka mpela ngunda. Nambo uli msimu weswela wa Mlungu.

Sambano Yesu akwete yejinji yakuti ayiganicisye, m’yoyo akwawula kumalo kwajika kukutamako masiku 40. Ali kweleko Satana akuyika kwa jwalakwe. Satana kwandaŵi sitatu akulinga kumtendekasya Yesu kuti atende cindu cakasa malamusi ga Mlungu. Nambo Yesu ngakutenda yeleyo.

Pambesi pa yeleyi, Yesu akuwuja, soni kaneko akusimana ni acalume ŵane ŵakuŵa ŵakumkuya ŵakwe kapena kuti ŵakulijiganya ŵakwe. Gane mwa mena gawo gali Andileya, Petulo (jwakolanjikwasoni kuti Simoni), Filipo, soni Nasaniyele (jwakolanjikwasoni kuti Batolomayo). Yesu yalumo ni ŵakulijiganya ŵakweŵa akwawula ku Galilaya. Ali ku Galilaya akwima mu msinda wa Kana kumangwawo Nasaniyele. Kweleko Yesu akwawula kucindimba cekulungwa ca ulombela, soni akutendako cakusimonjesya cakwe candanda. Ana akucimanyilila cakusimonjesyaci? Jwalakwe akusinda mesi kuŵa mfinyo.