ILAWIL le paloma ku taal tu yóokʼol u pool le máakaʼ. Le máakaʼ Jesús. Yaan kex 30 jaʼab tiʼ. Le máak yaan yiknaloʼ Juan. Yaan xan baʼax tsʼoʼok k-kanik tiʼ Juan. ¿Kʼajaʼan wa tech ka bin María u xíimbalt Elisabet le ka síitʼnaj yéetel kiʼimak óolal le chaambal yaan tu jobnel Elisabeteʼ? Le chaambal maʼ síijkoʼoʼ Juan. Baʼaleʼ beooraaʼ, ¿baʼax ku beetik Juan yéetel Jesús?

Juaneʼ táant u tʼubik Jesús ich u áalkab jaʼi Jordaneʼ. Bey u tsʼaʼabal le okjaʼoʼ. Ku tʼubaʼal máak ich jaʼ, tsʼoʼoleʼ ku jóoʼsaʼal. Bey u tsʼaa okjaʼ Juanoʼ; le beetik ku yaʼalaʼal tiʼ Juan Bautista. Baʼaleʼ, ¿baʼaxten tsʼoʼok xan u tsʼáaik u yokjaʼ Jesús?

Juaneʼ tu tsʼáaj, tumen Jesuseʼ taaleʼ ka tu yaʼalajtiʼ ka tsʼaʼabak u yokjaʼ, Juaneʼ ku tsʼáaik u yokjaʼ le máakoʼob tsʼoʼok u yaatal tu yóoloʼob úuchik u beetkoʼob baʼaloʼob kʼaastakoʼ. Baʼaleʼ, ¿yaan wa baʼax u beetmaj Jesús yaakúuntik yóol? Minaʼan, Jesuseʼ mix juntéen tu beetaj baʼax kʼaas, tumen letiʼeʼ u Paal Dios, kaʼan u taal. Le oʼolaleʼ yaan uláakʼ baʼax oʼolal tu yaʼalaj tiʼ Juan ka tsʼaʼabak u yokjaʼ. Koʼox ilik baʼaxiʼ.

Jesuseʼ carpintero kaʼach le maʼ taalak yiknal Juanoʼ. U meyaj utúul carpinteroeʼ u beetik mesa, silla yéetel kʼáancheʼob. José, u yíicham Maríaeʼ, carpintero kaʼachi, le oʼolal le tu kaʼansaj xan tiʼ Jesús. Baʼaleʼ Jéeobaeʼ maʼ tu túuxtaj u Paal way Luʼum utiaʼal u beet u carpinteroileʼ. Letiʼeʼ yaan upʼéel meyaj u tsʼáamaj tiʼ Jesús u beete, letiʼ túun tsʼoʼok u kʼuchul u kʼiinil u káajskoʼ. Utiaʼal u káajsik Jesús le meyaj tsʼaʼan tiʼ tumen u Taataoʼ, tu yaʼalaj tiʼ Juan ka tsʼaʼabak u yokjaʼ. ¿Maʼalob wa ilaʼabik tumen Dios lelaʼ?

Maʼalob, tumen ka jóokʼ Jesús ich le jaʼoʼ, upʼéel tʼaan jóokʼ teʼ kaʼanoʼ tiaʼalaj: Lelaʼ in Paal, tu yoʼolal máax jach kiʼimak in wóol. Le kaʼan xanoʼ bey jeʼepajeʼ ka taal u kiliʼich muukʼ Dios bey paloma tu yóokʼol Jesuseʼ.

Beooraaʼ Jesuseʼ yaʼab baʼax kʼaʼabéet u máansik tu tuukul, le oʼolal bin tiʼ upʼéel x-tokoy luʼum ich cuarenta kʼiinoʼob. Teʼeloʼ bin xan Satanás tu yiknal. Satanás túuneʼ, óoxtéen tu yóotaj u beet u maʼ uʼuyajtʼantaʼal u ley Dios tumen Jesús. Baʼaleʼ, Jesuseʼ maʼ tu beetaj baʼax u kʼáat Satanasiʼ.

Ka suunaj Jesuseʼ tu kʼaj óoltaj jujuntúul máakoʼob kʼuch u beetubaʼob u j-tsaypachoʼob, wa u j-kaambaloʼob. U kʼaabaʼobeʼ: Andrés, Pedro (ku kʼaabaʼtik xan Simón), Felipe yéetel Natanael (ku kʼaabaʼtik xan Bartolomeo). Jesús túuneʼ jóokʼ yéeteloʼob tu luʼumil Galilea, ka jeʼeloʼob tu kaajil Caná, u kaajal Natanael, teʼeloʼ tu kʼiimbesajil upʼéel tsʼoʼokol beeleʼ tu beetaj u yáax milagroiʼ. ¿A wojel wa baʼax? Tu sutaj vinoi le jaʼoʼ.