YESU mi mi fu wawɛɛ ngɛ hiɛ ɔ, aloo pi ja? O le nɔ́ nɛ ha e mi mi fu wawɛɛ kikɛ ɔ lo? Ejakaa nyumuhi nɛ ɔmɛ nɛ a ngɛ Mawu sɔlemi we ngɛ Yerusalem ɔ ji hɛtsuli. A ngɛ hlae nɛ a ná sika fuu kɛ je nihi nɛ ba Mawu jami ngɛ hiɛ ɔ a dɛ.

Anɛ o na nahi kɛ jijɔhi kɛ lahuɛ ɔmɛ lo? Nyumu ɔmɛ ngɛ lohwe nɛ ɔmɛ juae ngɛ sɔlemi we ɔ mi tutuutu. O le nɔ́ heje lo? Nɔ́ heje ji kaa, Israelbi ɔmɛ hia lohwehi nɛ a kɛ maa sã afɔle ha Mawu.

Mawu mlaa a tsɔɔ kaa ke Israelno ko tɔ̃ ɔ, e sã afɔle kɛ ha Mawu. Nɛ be komɛ hu ngɛ nɛ e sa kaa Israelbi ɔmɛ nɛ sã afɔle. Se jije Israelno ko ma ná lohwe ngɛ nɛ e kɛ sã afɔle ha Mawu?

Israelbi ɔmɛ ekomɛ lɛɛ lohwehi. Lɔɔ he ɔ, a ma nyɛ maa ngɔ eko kɛ ba sã afɔle. Se Israelbi fuu ji nihi nɛ be lohwe ɔmɛ eko. Nɛ ni komɛ hu je hehi nɛ a kɛ Yerusalem kɛ saminya, heje ɔ, a nyɛ we nɛ a ngɔɔ lohwe ɔmɛ eko kɛ baa sɔlemi we ɔ. Lɔɔ he ɔ, ni ɔmɛ baa hiɛ ɔ nɛ a ba heɔ lohwehi nɛ he hia mɛ ɔ. Se nyumuhi nɛ ɔmɛ heɔ mɛ sika fuu. A ngɛ ni ɔmɛ sisie. Ngɛ enɛ ɔ se ɔ, e sɛ kaa a juaa ní ngɛ Mawu sɔlemi we ɔ mi.

Enɛ ɔ lɛ ha Yesu mi mi fu ɔ nɛ. Lɔɔ he ɔ, e tsitsɛɛ nyumu ɔmɛ a we okplɔɔhi kɛ a nɔ sika amɛ kɛ pue si nɛ sika amɛ gbɛ fia. Lɔɔ se ɔ, e ngɔ kpa kɛ fiee lohwe ɔmɛ tsuo kɛ je sɔlemi we ɔ mi. Nɛ e fã ni ɔmɛ nɛ a ngɛ lahuɛ ɔmɛ juae ke: ‘Nyɛɛ ngɔ mɛ kɛ je hiɛ ɔ! Nyɛɛ kɛ ye Tsɛ we ɔ ko pee ní juami he.’

Yesu kaseli ɔmɛ a kpɛti ni komɛ piɛɛ e he ngɛ sɔlemi we ɔ mi ngɛ Yerusalem. A nya kpɛ a he ngɛ nɔ́ nɛ Yesu pee ɔ he. Kɛkɛ nɛ a kai nɔ́ nɛ a ngma ngɛ Baiblo ɔ mi nɛ e kɔ Mawu Bi ɔ he ɔ ke: ‘Suɔmi kɛ ha Mawu we ɔ maa tso ngɛ ye mi kaa la.’

Benɛ Yesu ngɛ Yerusalem kɛ ha Hetsɔmi gbijlɔ yemi ɔ, e pee nyakpɛ níhi fuu. Pee se ɔ, Yesu je Yudea nɛ e pue Galilea blɔ ekohu. Se benɛ e ya a, e gu Samaria huza a nɔ. Ha nɛ waa hyɛ nɔ́ nɛ ya nɔ ngɛ lejɛ ɔ.