Maana 89nan

Yesu ye Alabatoso saniya

YESU diminnen bɛ yan yɔrɔ la dɛ! Tiɲɛ tɛ? I b’a dɔn mun na a diminna nin cogo la wa? A kun ye ko mɔgɔ minnu nana u sigi  Alabatoso kɔnɔ yan Jerusalɛm, olu tun bɛ wari fɛ kojugu. U b’a ɲini ka wari caman bɔ mɔgɔw kun minnu bɛ na Alabatoso kɔnɔ walisa ka Jehova bato.

I ɲɛ bɛ misiw, sagaw ni ntubanin ninnu bɛɛ la wa? Nin baganw bɛ ka feere Alabatoso yɛrɛ de kɔnɔ. I b’a dɔn mun na wa? O bɛ kɛ bawo Israɛlkaw mago bɛ baganw ni kɔnɔninw na walisa k’olu di Ala ma saraka ye.

Ala ka sariya y’a jira ko ni Israɛlkaw ye kojugu kɛ, u ka kan ka saraka bɔ Ala ye. Ala ka sariya y’a jira fana ko Israɛlkaw tun ka kan ka sarakaw bɔ waati wɛrɛw la fana na. Nka, Israɛlkaw tun bɛ se ka kɔnɔninw ni baganw sɔrɔ yɔrɔ jumɛn na walisa k’olu kɛ saraka ye?

Israɛlka dɔw tun bɛ yen baganw ni kɔnɔninw tun bɛ minnu bolo walisa ka olu kɛ saraka ye. Nka, Israɛlka caman tun bɛ yen baganw walima kɔnɔninw tun tɛ minnu bolo. Hali ni baganw walima kɔnɔninw tun bɛ dɔw fana bolo, u tun sigilen bɛ dugu min na, o ni Jerusalɛm yɔrɔ tun ka jan ɲɔgɔn na kosɛbɛ, fo u tun tɛ se ka na ni u ka bagan si ye Alabatoso la. O de y’a to, mɔgɔw tun bɛ na yan, ka baganw walima ka kɔnɔninw san. Nka, nin cɛ minnu sigilen bɛ Alabatoso kɔnɔ yan Jerusalɛm, u tun bɛ baganw ani kɔnɔninw sɔngɔ gɛlɛya kosɛbɛ mɔgɔw ma. U tun bɛ u nanbara. Ka fara o kan, u tun man kan ka o fɛnw feere Alabatoso kɔnɔ.

O kow de ye Yesu ladimin. O kosɔn, a ye u ka tabaliw dafiri, ka warimisɛnw bɛɛ jɛnsɛn duguma. A ye jurukisɛ dɔ fana kɛ gɛɲɛ ye ka baganw bɛɛ gɛn ka bɔ Alabatoso kɔnɔ. A ko ntubaninfeerelaw ma: ‘Aw ka nin fɛnw ta ka bɔ yan! Aw k’a dabila ka ne Fa ka so kɛ jagokɛyɔrɔ ye.’

Yesu ni a ka kalanden dɔw tun bɛ ɲɔgɔn fɛ Alabatoso kɔnɔ Jerusalɛm. A balala kalandenw la kosɛbɛ ka Yesu ye ka o ko kɛ. U hakili jiginna Bibulu yɔrɔ la min b’a fɔ Ala Denkɛ ko la: ‘Ala ka so kanuya bɛna kɛ a la i ko tasuma.’

Yesu tun bɛ Jerusalɛm tuma min na Tɛmɛnkan seli kama, a ye kabako caman kɛ. O kɔfɛ, Yesu bɔra Jude, ka taama jan daminɛ ka segin Galile. Nka o taama kɔnɔna na, a tɛmɛna Samari fɛ. Fɛn min kɛra o yɔrɔ la, an ka o lajɛ ɲɔgɔn fɛ.

Yuhana 2:13-25; 4:3, 4.