JESÚS ipochyetereihína koʼápe, ajépa? Ndépa reikuaa mbaʼérepa? Pórke koʼã kuimbaʼe oĩva Ñandejára témplope Jerusalénpe, itaryryieterei. Oñehaʼã hikuái oipeʼa heta pláta umi héntegui oúva koʼápe oadora hag̃ua Ñandejárape.

Rehechápa umi tóro raʼy, ovecha ha palomakuéra? Koʼã kuimbaʼe ovendehína ko temploitépe voi. Ndépa reikuaa mbaʼérepa? Pórke umi isrraelíta oikotevẽ mymba ha guyrakuéra osakrifika hag̃ua Ñandejárape.

Ñandejára léi heʼi peteĩ isrraelíta hembiapo vaíramo, ojapovaʼerãha peteĩ ofrénda Ñandejárape. Ha hetave mbaʼére avei umi isrraelíta ojapovaʼerã pe ofrénda. Péro moõpa ikatu otopa guyra ha mymbakuéra ojapo hag̃ua upéva?

Oĩvaʼekue isrraelíta oguerekóva guyra ha mymbakuéra ikatúva omeʼẽ ofréndaramo. Péro heta isrraelíta ndoguerekói. Ha umi mombyry oikóva Jerusaléngui ndaikatúi ogueru hymbakuéra pe témplope. Upévare umi hénte ou ojogua koʼágui umi mymba ha guyrakuéra. Péro koʼã kuimbaʼe ovende hepyetereíma. Omonda umi héntepe. Avei, noñevendeivaʼerã mbaʼeve Ñandejára témplope.

Upévare Jesús ipochy. Ha upémaramo oity umi mesa oĩha pláta ha omosarambipa umi monedakuéra. Avei ojapo peteĩ tukumbo piólagui ha oguenohẽmba umi mymbakuéra témplogui. Heʼi umi palóma vendehápe: ‘Peguenohẽmbáke koʼágui! Anivéma pejapo che Ru rógagui peteĩ lugár oñembyaty hag̃ua viru’.

Oĩ umi Jesús segidorkuéra ohóva hendive ko témplope Jerusalénpe. Haʼekuéra nohaʼarõi Jesúsgui pe ojapóva. Upérõ imanduʼa hikuái la Bíbliape heʼiha Ñandejára Raʼy rehe: ‘Mborayhu Ñandejára róga rehe hendýta ipype tatáicha’.

Jesús oĩ aja Jerusalénpe pe Pascua jave, ojapo heta milágro. Upe rire, Jesús osẽ Judéagui ha oho jey Galiléape. Péro oho Samaria distríto rupi. Jahechami mbaʼépa oiko upépe.