Kukwe kira 89

Jesús templo yete

JESÚS tä rubun krubäte nete, ¿ñan ererea? ¿Ñobätä gare mäi? Ñobätä ñan aune nitre tä Jerusalén templo Ngöbökwe känti ye tö ngwian tuai bäri jakwe. Niaratre tö ngwian diankä ere nitre nüke Ngöbö mike täte yekän.

¿Nibi bätä obeja aune ütü ye jökrä tuin mäi? Nitre tä jondron ye rürübäine templo yete. ¿Ñobätä gare mäi? Ñobätä ñan aune nitre Israel ye tä jondron nire bätä nukwä ye ribere jai kukwadre Ngöböi.

Ngöbö Kukwei yebätä niebare nitre Israel käkwe kukwe käme nuaindre angwane, rabadre jondron bien Ngöböi ja ütiäre. Kukwe madabätä, nitre Israel rabadre jondron bien arato. Akwa ¿medente jondron nire bätä nukwä ye raba kwen ietre?

Nitre ruäre kwe nukwä bätä jondron nire ye nämene biandre. Akwa nitre Israel kwati kwe jondron nire bätä nukwä ye ñaka nämene jire. Nitre mada abokän nämene nüne mente krubäte, yebätä ñaka nämene nuäre jondron nire ye ngwandre kräketre templo yekänti. Yebätä nitre nämene kite nete jondron nire bätä nukwä ye kökö. Yebätä nitre ye nämene jondron rürübäine kabre krubäte. Niaratre nämene nitre goire. Ne mada, templo Ngöbökwe ye ñaka jondron rürübäinkrä.

Kukwe ye käkwe Jesús mikani rubun. Yebätä mesa biti ngwian nämene ye kwitaninkä kwe aune ngwian jökrä betaninkä timon. Arato kö sribebare kwe yebiti jondron nire nämene templo yete juani jubäre kwe. Nitre nämene ütü rürübäine ye ie niebare kwe: ‘¡Jondron ye denkä nete! Munkwe ñan ti Rün jue mika ngwian ganainkrä krubäte jai.’

Nitre ruäre nänkä Jesube nämene templo yete arato. Niaratre töi namani ñan krütare kukwe nuainbare Jesukwe yebätä. Kukwe niebare Bibliakwe Ngöbö Monsoi yebätä ye nükani törö ietre: ‘Ngöbö jue tare kwe ye rabai ñukwä kwrere niarabätä.’

Jesús nämene bieta Paskwa yebätä Jerusalén angwane, jondron ñan tuabare nuainbare krubäte kwe. Ye bitikäre Jesús nämene Judea nikaninta kä Galilea känti. Akwa niara nikani kä Samaria yekänti ta. Dre namani bare yete ani mike gare jai.

Juan 2:13-25; 4:3, 4.