Jesus ma kohorora ondembeli
EHUNGI 89
Jesus ma kohorora ondembeli
JESUS imba tjiri ma munika okupindika, katjiperi? Ove mo tjiwa kutja omena ratjike eye tja pindike tjinene nao? Omena rokutja ovarumendu mba mbe ri pondembeli mu Jerusalem va suvera ovimariva tjinene. Owo aave kondjisa okuwonga ovimariva ovingi movandu mbaave ya mba okurikotamena ku Mukuru.
Ozongombe azehe nḓo nozonḓu nozonguti mo vi munu? Ovarumendu mba aave randisire ovinamuinyo mbi mondembeli. Ove mo tjiwa kutja omena ratjike tjaave tjiti nao? Omena rokutja Ovaisrael aave hepa ovinamuinyo nouzera okupunguhira Mukuru.
Etwako raMukuru aari tja indu Omuisrael tja katuka, eye aa sokutjita ombunguhiro ku Mukuru. Nu pa ri notuveze twarwe Ovaisrael wina paave hepa okutjita ombunguhiro. Nungwari Ovaisrael atja ve isapi ovinamuinyo nouzera okupunguha ku Mukuru?
Ovaisrael tjiva va ri nouzera novinamuinyo. Okutja owo aave yenene okuvipunguha. Nungwari Ovaisreal ovengi kava ri novinamuinyo poo ouzera. Nu varwe va turire kokure tjinene na Jerusalem okutja owo kaave yenene okueta ovinamuinyo vyawo kondembeli. Okutja ovandu mba aave ya mba nave randa ovinamuinyo owo mbyaave hepa. Nungwari ovarumendu mba aave sutisa ovandu ovimariva ovingi tjinene. Owo aave nyoko ovandu. Nakombanda yanao, owo kaave sokurandisira ovinamuinyo vyawo imwi mondembeli.
Otjiṋa hi otji tja pindikisa Jesus. Okutja eye wa tjengura oviriro vyawo novimariva vyovarumendu vya randatera pehi navi rimbara. Eye wina wa ungura ongora yozongoze na ramba nayo ovinamuinyo avihe okuza mondembeli. Eye wa rakiza ovarumendu mbaave randisa ozonguti na tja: ‘Pitiseye oviṋa mbi mu tware! Ondjuwo yaTate ngaamu i isa po poṋa pokuwongerapo ovimariva ovingi.’
Ovahongewa vaJesus tjiva va ri mba puna ye mondembeli mu Jerusalem. Owo va kuminwe na imbi mbyaave munu Jesus ama tjiti. Okuzambo owo va zemburuka omambo mOmbeibela ohunga nOmuna waMukuru ngu maye tja: ‘Orusuvero kondjuwo yaMukuru maru yaka mu ye otja omuriro.’
Jesus ngunda a ri mu Jerusalem koPaska, eye wa tjita ovihimise ovingi. Kombunda yanao, Jesus wa ya ku Judea na utu ouyenda we okuyenda ku Galilea. Nungwari mondjira ye, eye wa pitira mu Samaria. Indjeye tu tare kutja imbo pa tjitwa tjike.
