Ɛisa yezzazdeg lemqam
TAQSIṬ TIS 89
Ɛisa yezzazdeg lemqam
MUQEL kan Ɛisa. Atan izɛef ayendin. Teẓriḍ acuɣer? Axaṭer irgazen-agi yellan di lemqam n Ṛebbi ččuṛen d ṭṭmeɛ. Ţnadin ad rebḥen aṭas n yedrimen ɣef yeɛrar n lɣaci i d-iţţasen ad ɛebden Ṛebbi.
Twalaḍ iɛejmiyen, akraren d yetbiren meṛṛa yellan di ţţeswiṛa-ya? Atnan znuzuyen-ten yergazen-agi di lemqam. Teẓriḍ acuɣer? Axaṭer At Isṛayil ḥwaǧen lḥiwan d leḍyur iwakken a ten-budden d iseflawen i Ṛebbi.
Lqanun n Ṛebbi inna-d belli ass ideg ara yedneb yiwen seg wat Isṛayil, ilaq ad yefk asfel i Ṛebbi. Lameɛna llant teswiɛin nniḍen i geţţawin At Isṛayil ad fken iseflawen. Anda i zemren ihi ad afen ifṛax d lḥiwan ara fken d iseflawen i Ṛebbi?
Kra seg wat Isṛayil kesben ifṛax d lḥiwan i zemren ad fken d iseflawen. Lameɛna aṭas seg-sen ur nesɛi ara d acu ara mudden. Ma d wiyaḍ beɛden aṭas ɣef temdint n Yarucalim, daymi ur zmiren ara ad awin yid-sen lḥiwan alamma d lemqam. Lɣaci ţṛuḥun ihi ɣer dinna, ţţaɣen-d lḥiwan neɣ ifṛax i ḥwaǧen. Lameɛna irgazen-agi i teţwaliḍ di ţţeswiṛa d imakaren axaṭer ssuturen i lɣaci xilla n iṣurdiyen. Yerna lukan d lebɣi, ur sen-ilaq ara maḍi ad xedmen ttjaṛa di lemqam n Ṛebbi.
D ayagi i gesserfan Ɛisa. Yeqleb ihi ṭṭwabel n yergazen-agi yerna issedwi idrimen-nsen meṛṛa ɣer lqaɛa. Ixdem diɣen ajelkaḍ s wemrar, dɣa yessufeɣ ɣer beṛṛa lḥiwan akk yellan di lemqam. Umbeɛd, yumeṛ i yergazen-nni yeznuzuyen itbiren: ‘Kkset akk annect-a ssyagi! Ur ţţarrat ara axxam n Baba d ssuq.’
Yuɣ lḥal, kra seg inelmaden n Ɛisa ddan yid-es ɣer lemqam n Yarucalim. Wehmen deg wayen yexdem. Lameɛna mmektan-d ayen yuran ɣef Mmi-s n Ṛebbi deg Wedlis Iqedsen: ‘Leḥmala yesɛa i wexxam n Ṛebbi treqq deg-s am tmes.’
Mi gella Ɛisa di temdint n Yarucalim, di lweqt n Lɛid n Usuref, aṭas n lbeṛhanat i gexdem. Umbeɛd yeǧǧa tamurt n Yahuda, yuɣal ɣer tmurt n Jlili. Akken ad iṛuḥ ɣer dinna, ilaq-as ad iɛeddi ɣef tmurt n Cumrun (Samarya). A nwali d acu yeḍran dinna.
