Ngewa ya 89: Yesũ Aithesya Ĩkalũ
VAA Yesũ eoneka e mũthatu, kana tiw’o? We nĩwĩsĩ athatĩte nĩkĩ? Nũndũ aũme aa me vaa ĩkalũnĩ me na ĩtomo mũno. Meenda makwate mbesa mbingĩ kuma andũnĩ ala mokĩte vaa kũthaitha Ngai.
We nĩwene nzaũ iiya syonthe sya mũika na malondu na mavũĩ? Aũme asu methooesya nyamũ isu vaa ĩkalũnĩ. We nĩwĩsĩ nĩkĩ? Nũndũ Aisilaeli nĩmendaa nyamũ na nyũnyi mathembee Ngai.
Mwĩao wa Ngai waĩtye Mũisilaeli eeka ũndũ mũthũku, aĩlĩte kumĩsya Ngai nthembo. Na ĩngĩ kwaĩ mavinda angĩ, Aisilaeli maĩ no nginya maumye nthembo. Ĩndĩ Mũisilaeli aĩ aumye va nyũnyi na nyamũ sya kũthembea Ngai?
Aisilaeli amwe maĩ na nyũnyi na nyamũ syoo. Kwoou nĩmaĩ matonya kumya isu. Ĩndĩ angĩ mayaĩ na nyamũ kana nyũnyi syoo. Namo angĩ mekalaa kũasa mũno na Yelusaleme na mayaĩ matonya kũete imwe sya nyamũ syoo ĩkalũnĩ. Kwoou andũ asu mookaa vaa na kũthooa nyamũ na nyũnyi ila mekwenda. Ĩndĩ aũme aa mametasya mbesa mbingĩ mũno. Nĩmamakengaa. O na ũu wĩ o vo, mayaĩlĩte kwĩthĩwa maithooesya vaa ĩkalũnĩ ya Ngai.
Kĩu nĩkyo kyamũthatitye Yesũ. Kwoou ang’uthũlanga mesa sya aũme asu maĩ na mbesa na anyaĩĩkya ilovia syoo. Nake aseũvya mũsalisa wa ndii na akuthũa nyamũ isu syonthe kuma ĩkalũnĩ. Na amea ala mathooasya mavũĩ: ‘Umaalyai syĩndũ ii! Ekai ũmĩtw’ĩkĩthya nyũmba ya Asa wakwa vandũ va kũseũvĩsya mbesa mbingĩ.’
Aatĩĩi amwe ma Yesũ maĩ vamwe nake ĩkalũnĩ kũu Yelusaleme. Mo nĩmaseng’ie nĩkwona ũndũ Yesũ weekie. Na ĩndĩ malilikana vandũ vala Mbivilianĩ vaasya ũũ ĩũlũ wa Mwana wa Ngai: ‘Kĩwĩu kya nyũmba yaku kĩkakana nthĩnĩ wake ta mwaki.’
Yĩla Yesũ waĩ vaa Yelusaleme vala wookĩte mbokanĩ ya Vasaka, nĩweekie syama mbingĩ mũno. Ĩtina wa ũu, Yesũ nĩwaumie Yutia na ambĩĩa kyalo kya kũsyoka Kalilii. Ĩndĩ e nzĩanĩ, esĩla nthĩ ya Samalia. Ekai twone ũndũ kweethĩiwe.
Yoana 2:13-25; 4:3, 4.
Makũlyo
- Nĩkĩ indo ii iũthooew’a ĩkalũnĩ?
- Nĩ kyaũ kyathilĩkilye Yesũ?
- O tondũ ũtonya kwona vaa visanĩ, Yesũ eekie ata, nake eeĩaĩe andũ asu meũthoosya mavũĩ ata?
- Yĩla aatĩĩi ma Yesũ moonie ayĩka ũndũ weekie, mo malilikanie kyaũ?
- Yesũ esĩile kĩvalo kĩva kati e kyalonĩ kya kũsyoka Kalilii?
Ĩkũlyo ya kwongeleela
- Soma Yoana 2:13-25.
Kwa kũsũanĩa ĩũlũ wa kũthilĩka kwa Yesũ nũndũ wa avunzany’a ma mbesa ĩkalũnĩ, twaĩlĩtwe kwĩthĩwa na woni mwaũ ĩũlũ wa kũthooanĩsya syĩndũ nthĩnĩ wa Nyũmba ya Ũsumbĩ? (Yoa. 2:15, 16; 1 Ako. 10:24, 31-33)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Yesũ Aĩ na Kĩthito Kwondũ wa Ũthaithi wa W’o
Ethĩwa Mĩao ya Ngai nĩyeetĩkĩlĩtye andũ kũthooa nyamũ taoninĩ ya Yelusaleme nĩ kana mamũthembee Ngai, nĩkĩ Yesũ wathatiw’e nĩ andũ ala makũnaa viasala ĩkalũnĩ?
