MA NAKAANAW kʼaʼut kichalk xjosqʼil li Jesus? Xbʼaan naq ebʼ li winq, li wankebʼ saʼ li Rochoch li Yos aran Jerusalen, yookebʼ risinkil naabʼal li tumin chiruhebʼ li nekeʼloqʼonink re li Yos.

Ebʼ li winq li wankebʼ saʼ li Rochoch li Yos, yookebʼ xkʼayinkil ebʼ li bʼooyx, ebʼ li karneer ut ebʼ li mukuy. Ma nakaanaw kʼaʼut yookebʼ chi kʼayink arin? Xbʼaan naq, ebʼ laj Israel nekeʼmayejak chiru li Yos.

Saʼ li qʼe kutan li xchaqʼrabʼ li Yos naxye naq ebʼ laj Israel teʼmaakobʼq, tento naq teʼmayejaq. Abʼan moko kaʼaj tawiʼ chirix li maak keʼmayejak, keʼmayejak ajwiʼ chirix ebʼ li jalan jalanq chi kʼanjel. Bʼar keʼxtaw ebʼ li xul li keʼxmayeja?

Ebʼ laj kʼirisinel xul ut mukuy, moko kichʼaʼajkoʼk ta chiruhebʼ naq keʼmayejak. Abʼan, wankebʼ maakʼaʼ kʼaru teʼxmayeja. Ut wankebʼ ajwiʼ li nekeʼchalk chi najt, moko keʼru ta chi xkʼambʼal junaq li xul re xmayejankil. Joʼkan naq keʼchalk chi xloqʼbʼal ebʼ li xul saʼ li Rochoch li Yos. Ebʼ laj kʼay yookebʼ chi relqʼankil naabʼal li tumin chiruhebʼ li keʼloqʼonink re li Yos, xbʼaan naq terto yookebʼ xkʼayinkil ebʼ li xul. Ut li Rochoch li Yos maawaʼ kʼayibʼaal.

Joʼkan naq li Jesus kixbʼalqʼusihebʼ li meex ut kixkut chixjunil li tumin saʼ chʼochʼ. Chirix chik aʼan, kirisi chixjunil ebʼ li xul saʼ Rochoch li Yos ut kixye rehebʼ laj kʼay: ‹Isihomaq arin ebʼ li mukuy! Meekʼe choʼq kʼayiil li Rochoch linYuwaʼ, arin nekexchalk chi bʼihomoʼk›.

Ebʼ li xtzolom li Jesus, li wankebʼ rikʼin, keʼsach xchʼool naq keʼril aʼin. Tojaʼ naq keʼjultikoʼk rehebʼ li naxye li Santil Hu chirix li Ralal li Yos: ‹Rikʼin xraabʼal laawochoch naxamamnak linchʼool›.

Li Jesus kixbʼaanu naabʼal li sachbʼachʼoolej naq yook chaq xnimankil li Paswa aran Jerusalen. Naq li Jesus kiʼelk chaq saʼ li tenamit Judea kisutqʼiik Galilea. Abʼan toj kinumeʼk saʼ xteepal Samaria, ma nakaanaw kʼaru kikʼulmank aran?