HAHA Jesu aronekana arĩ mũrakaru mũno, kana tiguo? Wee-rĩ, nĩ ũũĩ arakarĩtio nĩ kĩĩ? Gĩtũmi nĩ atĩ andũ aya me thĩinĩ wa hekarũ ya Ngai Jerusalemu nĩakoroku mũno. Marageria gũthondeka mbeca nyingĩ kuuma kũrĩ andũ arĩa mokĩte hekarũ-inĩ gũthathaiya Ngai.

Nĩ ũrakĩona tũtegwa na ng’ondu na ndutura? Ĩĩni, andũ aya maracienderia hekarũ-inĩ thĩinĩ. Wee-rĩ, nĩ ũũĩ gĩtũmi? Gĩtũmi nĩ tondũ Aisiraeli nĩ mabatairio nĩ nyamũ na nyoni cia kũrutĩra Ngai igongona.

Watho wa Ngai woigĩte atĩ rĩrĩa Mũisiraeli ehia-rĩ, no mũhaka arutĩre Ngai igongona. Ningĩ nĩ kwarĩ na mahinda mangĩ, rĩrĩa Aisiraeli maangĩarutire magongona. No rĩu-rĩ, Mũisiraeli angĩarutire kũ nyoni na nyamũ cia kũrutĩra Ngai igongona?

Aisiraeli amwe nĩ maarĩ na nyoni na nyamũ ciao kĩũmbe. Nĩ ũndũ ũcio nĩmangĩarutire icio. No ningĩ Aisiraeli aingĩ matiarĩ na nyoni kana nyamũ ta icio. Angĩ nao matũũraga kũraya mũno na Jerusalemu na nĩ ũndũ ũcio matingĩahotire gũcirehe hekarũ-inĩ. Kwoguo andũ mokaga kũgũra nyamũ na nyoni iria ciendekanaga. No ĩndĩ endia acio metagia andũ mbia nyingĩ mũno. Maahenagia andũ buru. Ũkĩongerera ũguo-rĩ, matiagĩrĩirũo o na atĩa kwenderia hekarũ-inĩ ya Ngai.

Ũndũ ũyũ nĩguo watũmire Jesu arakare. Kwoguo akĩgũithania metha cia andũ arĩa mathogoranaga mbia na kũharagania thendi ciao thĩ. Ningĩ, agĩthondeka mũcarica wa ndigi na akĩrutũrũra nyamũ ciothe nja ya hekarũ. Agĩatha andũ arĩa mendagia ndutura akiuga atĩrĩ: ‘Umiai ici gũkũ! Tigai gũtua nyũmba ya Awa nyũmba ya thogora.’

Amwe a arũmĩrĩri a Jesu maarĩ hamwe nake hekarũ-inĩ Jerusalemu. Nĩ magegirio nĩ kuona ũrĩa Jesu ekanirie. Na rĩu makĩririkana handũ harĩa haandĩkĩtwo Biblia-inĩ ũhoro wa Mũrũ wa Ngai atĩrĩ: ‘Nĩ kĩyo kĩrĩa ndĩ nakĩo kĩa nyũmba yaku gĩkandĩa.’

Rĩrĩa Jesu aakĩrĩ kũu Jerusalemu gĩathĩ-inĩ kĩa Bathaka, nĩaringire ciama nyingĩ. Thutha ũcio Jesu akiuma Judea na agĩtherera erekeire Galili. No e njĩra-inĩ, akĩhĩtũkĩra bũrũri wa Samaria. Tareke tuone ũrĩa gwekĩkire.