JEZÚ uala muene kála ua dizangala kiavulu, ki kiene? Uejiia mukonda diahi? Mukonda dia maiala iâ, akua luímbi, a mu sumbisa mu tembulu ia Nzambi mu Jeluzaleme. Ene akexile mu nganhala kitadi kiavulu ku athu akexile mu kuíza mu bheza Nzambi.

Ua mu mona o tu ngombe ni jimbudi ni madiembe? O maiala a mu sumbisa muene o ibhaku íii mu tembulu. Uejiia mukonda diahi? Mukonda akua Izalaiele a mesene o ibhaku ni jinjila phala ku i satela Nzambi.

O kitumu kia Nzambi kiambele kuma, se mukuá Izalaiele u ta kituxi, muéne ua tokalele ku bhana sata kua Nzambi. Kua kexile ué ithangana iéngi, phala akua Izalaiele a bhanga o sata. Maji kuebhi mukuá Izalaiele kueji sanga o jinjila ni ibhaku phala ku i bhakuila Nzambi?

Saí akua Izalaiele akexile ni jinjila ni ibhaku. Ene a tokalele ku i satela. Maji saí akua Izalaiele, ka kexile ni ibhaku mba jinjila. A mukuá a tungile dikanga ku Jeluzaleme, ka tenene kuíza ni ibhaku iâ mu tembulu. Kienhiki, athu ejile, ia kexile mu sumba o ibhaku ia mesene. Maji o maiala iâ, akexile mu kobhalala kitadi kiavulu ku mundu. Ene akexile mu nganala o mundu. Ka tokalele ku sumbisila mu tembulu ia Nzambi.

Kiki kiene kia bhangesa Jezú ku dizangala kiavulu. Muéne ua texi o meza a asumbisi ni itadi iâ. Ua bhange ué o xikote ia ngoji, iu ua kaie o ibhaku ioso bhu kanga dia tembulu. Muéne ua tumina o maiala akexile mu sumbisa o madiembe: ‘Katulenu o ibhaku íii bhu kanga! Ehenu mu ku bhanga o inzo ia Tat’etu kála kitanda kia uenji.’

Saí maxibulu a Jezú a mu kaiela katé mu tembulu mu Jeluzaleme. Ene a diuanene mu ku tala ia mu bhanga Jezú. Ene a lembalala-phe ia zuelele o Bibidia ia lungu ni Mon’a Nzambi: ‘O henda ia inzo ia Nzambi ia-nda mu xixima kála túbhia.’

Kioso Jezú kia kexile mu Jeluzaleme mu fesa ia Phasu, muéne ua bhangele madiuanu avulu. Anga, Jezú u xisa Judeia, iu ua mateka o njila mu ku vutuka mu Ngalileia. Maji mu njila, muéne ua bhitile mu mbanza ia Samádia. Ndoko tu tale se ihi ia bhiti koko.