JESUS kuna kumoneka asi ana handuka sili apa, ndi ngapi? Ono diva asi morwasinke ana handukire ngesi? Morwa vagara ava montembeli zaKarunga moJerusarema kuna dowokere unene yimaliva. Awo kuna hara kugusa yimaliva kovantu ava vana wiza va ya kanderere Karunga.

To mono nontwedugona nononzwi nononkutji nadinye odo? Vagara ava kuna kurandesera yikorama eyi moomu montembeli. Ono diva asi morwasinke? Morwa Vaisraeli kwa hepa yikorama noyidira va zambe kwaKarunga.

Veta zaKarunga kwa tente asi nsene Muisraeli ana zono, ga kona kugava nzambo kwaKarunga. Pwa kere hena yikando yimwe apa Vaisraeli va hepere kugava nonzambo. Nye kupi oku na gwana Muisraeli yidira ndi yikorama a gave kwaKarunga?

Vaisraeli vamwe va wekere yidira ndi yikorama. Awo kuvhura nyekuzamba eyi. Nye Vaisraeli wovanzi kapi va wekere yikorama ndi yidira. Ano vamwe kwa tungire ure sili naJerusarema makura kapi ngava vhuru kusimba yikorama yawo kontembeli. Vantu makura ngava wiza nokuyaranda yikorama noyidira eyi va hepere. Nye vagara ava ngava futisa vantu yimaliva yoyinzi unene. Awo ngava kumbagere vantu. Kugusa ko eyi, awo nokuvhura si kurandesera moomu montembeli zaKarunga.

Eyi yiyo yina handukisa Jesus. Makura ta zundagura yitafura yovagara ava nokumwaga yimaliva yawo. Ntani ta rugana hena ngora zonongodi nokusinga yikorama nayinye yi pwage mo montembeli. Ta pangere vagara ava vana kurandesa nonkutji asi: ‘Di guseni mo omu! Hagekeni kuninka nzugo zaTate evango lyokuyagwanena yimaliva.’

Vasikuli vaJesus vamwe kumwe nendi vana kara oku kontembeli moJerusarema. Awo tava tetuka kweyi va mwene Jesus ta rugana. Makura tava diworoka nonkango domoBibeli edi da tanta kuhamena MunwaKarunga asi: ‘Eharo lyonzugo zaKarunga ngali twera mwendi ngwendi mundiro.’

Jesus apa ana ya kara omu moJerusarema poPaska, ta rugana yitetu yoyinzi. Konyima zeyi, Jesus ta tundu moJudeya nokuza morugendo rwendi rokutengura koGalireya. Nye monzira zendi, ta piti momukunda gwaSamaliya. Tu tareni asi yinke yina kuhoroka mo.

Johanesa 2:13-25; 4:3, 4.