ພະເຍຊູຊຳລະວິຫານ
ບົດ 89
ພະເຍຊູຊຳລະວິຫານ
ທີ່ນີ້ພະເຍຊູມີທ່າທີໂກດເຄືອງຫຼາຍແທ້ແມ່ນບໍ? ເຈົ້າຮູ້ບໍເປັນຫຍັງພະອົງຈຶ່ງໂກດເຄືອງແທ້ໆ? ເພາະພວກເຫຼົ່ານີ້ໃນບໍລິເວນວິຫານຂອງພະເຈົ້ານະເຢຣຶຊາເລມເປັນຄົນໂລບອີ່ຫຼີ. ເຂົາພະຍາຍາມທີ່ຈະຫາເງິນຈາກຜູ້ຄົນທີ່ມານະມັດສະການພະເຈົ້າທີ່ນີ້.
ເຈົ້າເຫັນບັນດາລູກງົວເຖິກນ້ອຍ ແກະແລະນົກເຂົາເຫຼົ່ານັ້ນບໍ? ເອົາລະ ຄົນພວກນັ້ນພວມຂາຍຝູງສັດເຫຼົ່ານີ້ນະບໍລິເວນວິຫານນີ້ເອງ. ເຈົ້າຮູ້ບໍວ່າເປັນຫຍັງ? ເພາະວ່າຊົນຍິດສະລາເອນຈຳເປັນຕ້ອງໃຊ້ສັດແລະນົກເພື່ອຖວາຍບູຊາແກ່ພະເຈົ້າ.
ກົດໝາຍຂອງພະເຈົ້າກ່າວວ່າເມື່ອຊົນຍິດສະລາເອນຄົນໃດໄດ້ເຮັດຜິດ ເຂົາຄວນນຳເຄື່ອງບູຊາມາຖວາຍແກ່ພະເຈົ້າ. ແລະມີຄາວອື່ນໆອີກດ້ວຍທີ່ຊົນຍິດສະລາເອນຕ້ອງເຮັດການຖວາຍ. ແຕ່ເຂົາຈະສາມາດເອົານົກແລະສັດເຫຼົ່ານີ້ຈາກບ່ອນໃດມາໃຊ້ຖວາຍບູຊາແກ່ພະເຈົ້າ.
ຊົນຍິດສະລາເອນບາງຄົນມີນົກແລະສັດເປັນຂອງຕົນເອງ. ດັ່ງນັ້ນພວກເຂົາຈຶ່ງສາມາດຖວາຍສັດເຫຼົ່ານີ້ໄດ້. ແຕ່ຊົນຍິດສະລາເອນຫຼາຍຄົນບໍ່ມີສັດແລະນົກເປັນຂອງຕົນເອງ. ແລະຄົນອື່ນໆທີ່ອາໄສຢູ່ໄກຈາກເຢຣຶຊາເລມບໍ່ສາມາດນຳເອົາສັດຫຼືນົກມາຍັງວິຫານໄດ້. ດັ່ງນັ້ນຜູ້ຄົນໄດ້ມາທີ່ນີ້ເພື່ອຊື້ສັດຫຼືນົກທີ່ເຂົາຕ້ອງການໃຊ້. ແຕ່ວ່າຄົນພວກນີ້ຄິດລາຄາກັບຜູ້ຄົນແພງເກີນໄປ. ພວກເຂົາສໍ້ໂກງຜູ້ຄົນ. ນອກຈາກນັ້ນ ເຂົາບໍ່ຄວນຈະເຮັດການຊື້ຂາຍທີ່ນີ້ເລີຍໃນວິຫານຂອງພະເຈົ້າ.
ຂໍ້ນີ້ເອງທີ່ເຮັດໃຫ້ພະເຍຊູໂກດ. ດັ່ງນັ້ນພະອົງຂ້ວມໂຕ໊ະແລກເງິນຂອງພວກເຂົາແລະເງິນຫຼຽນກະຈາຍໄປ. ນອກຈາກນັ້ນ ພະອົງຍັງເອົາເຊືອກມາເຮັດໄມ້ແສ້ໃຊ້ຂັບໄລ່ພວກສັດທັງໝົດອອກຈາກວິຫານ. ພະອົງສັ່ງຄົນຂາຍນົກເຂົາວ່າ: ‘ຈົ່ງເອົານົກເຫຼົ່ານັ້ນອອກໄປຈາກທີ່ນີ້! ຢ່າເຮັດໃຫ້ລາຊະສຳນັກແຫ່ງພະບິດາຂອງເຮົາເປັນສະຖານທີ່ຄ້າຂາຍ.’
ສາວົກບາງຄົນຂອງພະເຍຊູຢູ່ກັບພະອົງນະວິຫານໃນເຢຣຶຊາເລມ. ເຂົາປະຫຼາດໃຈທີ່ເຫັນພະເຍຊູເຮັດຢ່າງນັ້ນ. ຄັນແລ້ວພວກເຂົາຈຶ່ງຈື່ຂໍ້ຄວາມໃນຄຳພີ ຊຶ່ງກ່າວເຖິງພະບຸດຂອງພະເຈົ້າວ່າ: ‘ຄວາມຮັກທີ່ມີຕໍ່ລາຊະສຳນັກຂອງພະເຈົ້າຈະຮ້ອນຮຸ່ມໃນພະອົງຄືໄຟ.’
ຂະນະທີ່ພະເຍຊູຮ່ວມເທດສະການປັດສະຄາທີ່ເມືອງເຢຣຶຊາເລມ ພະອົງເຮັດການອັດສະຈັນຫຼາຍຢ່າງ. ຫຼັງຈາກນັ້ນ ພະອົງອອກຈາກແຂວງຢູດາແລະເລີ່ມເດີນທາງກັບໄປແຂວງຄາລີເລ. ແຕ່ຂະນະທີ່ເດີນທາງພະອົງຜ່ານແຂວງສະມາລີ. ໃຫ້ເຮົາເບິ່ງວ່າມີຫຍັງເກີດຂຶ້ນທີ່ນັ້ນ.
