MPANJI 89

Yesu Nafumishi Antu muTembeli

AHANU Yesu nakumwekana nazuwi chikupu, netuku? Wuneluki muloña wunazuwiliyi? Muloña wakwila awantu adi hatembeli yaNzambi muYerusalema akweti lwisu nankashi. Anakukeña kutambula mali amavulu kudi antu anakwinza hatembeli nakudifukula kudi Nzambi.

Wunayimoni ana anyana kañombi ejima nianyikoku nitupompa? Eña, awa amayala anakulandishila awa ayimuna hohenaha hatembeli. Wuneluki muloña waweni? Muloña wakwila aIsarela akeñaña ayimuna niatujila akulambula kudi Nzambi.

Nshimbi yaNzambi yahosha nawu, neyi kaIsarela neli nshidi, watela kulambula mulambu kudi Nzambi. Kwadiña nimpinji yikwawu tuhu yadiñawu aIsarela nakulambulawu nyilambu. Indi kaIsarela watela kuwana atujila niayimuna kudihi akulambula kudi Nzambi?

A Isarela amakwawu atadikili atujila niayimuna. Dichi ateleli kulambula yeniyi. Ilaña aIsarela amavulu hiyatadikilihu ayimuna hela atujilaku. Amakwawu niwena ashakamineña kwakulehi naYerusalema dichi hiyatwesheleña kuleta yimuna yawu kutembeliku. Dichi antu enjileña kunu nakulanda ayimuna niatujila iyakeñeleñawu. Ilaña awa amayala adiña nakuyilandisha antu hawuseya weneni. Adiña nakuyidyila antu. Cheñi nawa, hiyateleleli kulandishilaña hanu hatembeli yaNzambiku.

Ichi dichinamuhilishi Yesu. Dichi hakuhinona jimesa jawantu nakupalañesha nimali awu. Hakushinta cheñi chikoti chanyonji nakuhaña nachu ayimuna ejima mutembeli. Hakuyileja awa amayala anakulandisha tupompa nindi: ‘Yifumishenumu munu! Bayi mubalumuna itala daTata yami diikali iluña dakwililamu mali amavuluku.

Atumbanji twaYesu amakwawu adi nindi hanu hatembeli muYerusalema. Anahayami hakumona yuma yinakwilayi Yesu. Dichi hiyakwanuka hana hahoshawu muBayibolu hadi Mwana kaNzambi nawu: ‘Kukeña kwetala daNzambi kwakabidima mudi yena neyi kesi.’

Henohu Yesu wudi munu muYerusalema kuPaseka, hakwila yihayamisha yayivulu. Nkumininaku, hakufuma muYudeya nakutachikaku lwendu lwakufunta kuÑaliliya. Ilaña chafuntileñayi, hakuhitila munkambi yaSamariya. Tutalenu chuma chamwekeni kuna.

Yowanu 2:13-25; 4:3, 4.