¿TIQUʼN ma tzaj tqʼoj Jesús? Tuʼnjo nbʼant nim tiʼchaq kyuʼn xjal tuj tja Dios naq tuʼn tten nim tiʼchaq kye. Nel kyiʼn nim pwaq kyiʼj xjal aqeju nchi ul kʼulil toj tja Dios.

¿Nche tila qe wakẍ, qe rit, mo ẍneʼl, ex qe palom? Aqejo xjal lu atx, moqa axtzu, nchi kubʼ kykʼayin toj tja Dios. ¿Nel tnikʼa tiquʼn? Tuʼnju iltaq tiʼj tuʼn tkubʼ kyqʼoʼn aj Israel txkup te oyaj twitz Dios.

Ntzajteq tqʼamaʼn tley Dios qa ma kubʼ tbʼinchaʼn jun aj Israel jun mya bʼaʼn, iltaq tiʼj tuʼn tkubʼ tqʼoʼn jun oyaj twitz Dios. Ax ikx, tuj junjuntl maj in kubʼtaq kyqʼoʼn aj Israel oyaj twitz Dios. ¿Jaʼteqtzun jaku che kanet palom ex txqantl txkup tuʼn tkubʼ kyqʼoʼn te oyaj?

Attoq junjun xjal atteq kypalom ex attaq kytxkup tuʼn tkubʼ kyqʼoʼn te oyaj. Nimqetl aj Israel mitiʼtaq kypalom nix kytxkup. Aqetzen txqantl aj Israel mitiʼtoq nbʼant tuʼn ttzaj kyiʼn txkup toj tja Dios tuʼnjo najchaqtoq nchi najana tiʼj Jerusalén. Tuʼntzunju, atztaq nchex kylaqʼon xjal txkup tzalu. Naqtzen tuʼnj nimtoq kywiʼ txkup kyuʼn qe kʼayel. Nche kubʼteq kyelqʼaʼn xjal. Ax ikx nyateq bʼaʼn tuʼn kykʼayin tzalu tuj tja Dios.

Tuʼn jlu tzaj tqʼoj Jesús ex ok ten pichʼkʼuʼl qe mes jatumel tkubʼteq pwaq ex el bʼaj chitj pwaq. Ex kubʼ tbʼinchan jun asyal tukʼe kʼjaj ex i etz tlajoʼn qe txkup ateʼkx toj tja Dios. Xi tqʼamaʼn kye qejo nchi kʼayintaq palom: ‹¡Kyiʼn exe qe jlu tzalu! Miʼn tzʼok kyqʼoʼne tja nMane te kʼaybʼil jatumel jaku kykambʼaye nim pwaq›.

Attoq junjun t-xnaqʼtzbʼen Jesús lepchiqeʼktaq tiʼj toj tja Dios atz tuj Jerusalén. Bʼiʼx naj kynabʼl tiʼjju nbʼantteq tuʼn Jesús. Tzajtzun kynaʼn aju in tmaʼn tuj Tuʼjil tiʼj tKʼwaʼl Dios: ‹Ma tzaj chyon wanmiye tuʼn tlaj at nkʼuʼje tiʼj tjaya›.

Tej attaq Jesús tuj Xjan qʼij atz toj Jerusalén, kubʼ tbʼinchaʼn nim tbʼanel naq tuʼn tipumal Dios. Tbʼajlenxi jlu, etz Jesús toj Judea tuʼn tmeltzʼaj juntl maj tuj Galilea. Nej ikʼ tuj Samaria. Ok kʼelel qnikʼ tiʼ bʼaj atztzu.