KOTO ta̱ Jesús, sáa̱ní-inira ¿saá? ¿Á xíni̱ún ndachun sáa̱ní-inira? Saáchi na̱ ñúʼu ini templo Jehová ñuu Jerusalén ndeéní kútóona xu̱ʼún. Ku̱a̱ʼání xu̱ʼún távána ndaʼa̱ na̱ yiví na̱ va̱xi ndásakáʼnu Ndióxi̱ ini veʼe yóʼo.

Koto tí si̱ndi̱ki̱, tí ndikachi xíʼin tí sa̱ta. Na̱ yiví íxi̱kónarí ini templo. ¿Á xíni̱ún ndachun íxi̱kónarí? Saáchi na̱ ñuu Israel xíniñúʼuna kití yóʼo ña̱ kaʼnínarí nu̱ú Ndióxi̱.

Ña̱ ley Ndióxi̱ káchiña tá iin na̱ ñuu Israel ke̱ʼéna ña̱ va̱ása va̱ʼa, xíniñúʼu kaʼnína iin kití nu̱ú Ndióxi̱. Sava yichi̱ ni kǒo ña̱ kini kéʼéna, ni saáví xíniñúʼu kaʼnívanarí nu̱úra. Soo, ¿ndáa míí ku̱ʼu̱nna kiʼinna kití kaʼnína nu̱ú Ndióxi̱?

Savana íyo kití sa̱na̱na ña̱ kaʼnína nu̱ú Ndióxi̱. Soo ku̱a̱ʼání na̱ kǒorí nu̱ú. Savatuna káni̱ní ke̱ena ña̱ ki̱xa̱a̱na ñuu Jerusalén, ta kǒo kívi kixi kití sa̱na̱na xíʼinna. Ña̱kán va̱xina sátánarí á kueenarí ini templo yóʼo. Na̱ íxi̱kórí yaʼviní íxi̱kónarí. Na̱ íxakuíʼnava kúúna xu̱ʼún na̱ yiví. Ta ni kǒo yichi̱na ña̱ xi̱kóna kití ini templo.

Xa̱ʼa ña̱yóʼo sáa̱-ini ta̱ Jesús xínirana. Sa̱ndúvara mesa nu̱ú ñúʼu xu̱ʼúnna ta ni̱xi̱ta̱ ndiʼi ña̱yóʼo. Tasaá ki̱ʼinra iin yoʼo̱, ta xíʼin ña̱yóʼo ta̱vára ndiʼi kití tí ñúʼu ini templo. Ta ni̱ka̱ʼa̱nra xíʼin na̱ íxi̱kó tí sa̱ta: ʼTavándó kití yóʼo, chi su̱ví veʼe nu̱ú íxi̱kóna kití kúú veʼe Yivái̱ʼ.

Sava na̱ ndíku̱n sa̱tá ta̱ Jesús ki̱xa̱a̱na xíʼinra ini templo. Nda̱kanda̱-inina tá xi̱nina ña̱ ke̱ʼé ta̱ Jesús. Tasaá nda̱kaʼánna ña̱ káʼa̱n Biblia xa̱ʼa Se̱ʼe Ndióxi̱: ʼÑa̱ kúʼvi̱ní-inira xínira veʼe Ndióxi̱ iin xíxi̱-inira xa̱ʼañaʼ.

Tá ndíka̱a̱ ta̱ Jesús ña̱ Pascua ñuu Jerusalén, ku̱a̱ʼání milagro ke̱ʼéra. Tándi̱ʼi nda̱koora ñuu Judá ta nda̱ndikóra chí ñuu Galilea. Tasaá ni̱ya̱ʼara chí ñuu Samaria. Ná kotoyó ndáaña ku̱u ñuu kán.