Jesús kichipauak templo
Tanojnots 89
Jesús kichipauak templo
NIKAN moita ika Jesús tel kualantok, ¿melauj? ¿Tikmati keyej? Porin nejin takamej tein yetokej itech itemplo Dios tein moajsi Jerusalén tel xijxikuimej. Uan kinkixtiliaj miak tomin israelitas tein kiueyichiuakij Dios.
¿Tikinita kuakuejmej, ichkamej uan uiltsitsin tein nejin takamej kininamakatokej nikan itech templo? ¿Tikmati keyej? Porin israelitas monekia kimakaskej Dios tapialmej uan totomej kemej netetayokolilmej.
Itanauatil Dios kijtouaya ika keman se israelita kichiuaya teisa tein amo kuali, monekia kimakas Dios se nemaktil. Uan keman kiueyichiuayaj, no monekia kimakaskej nemaktilmej. Sayoj ika, ¿kani kinkuiskiaj tapialmej uan totomej tein kitemakaskiaj?
Sekin kipiayaj totomej uan tapialmej tein kitemakaskiaj. Sayoj ika miakej israelitas amo kipiayaj. Uan sekin tel uejka nemiaj uan amo uelia kiuikayaj se tapial itech templo. Yejika israelitas yayaj itech templo uan kinkouayaj tapialmej uan totomej. Sayoj ika nejin takamej tel patiyoj kininamakayaj. Ijkon kintachtekiayaj israelitas. Uan amo no kuali yetoya maj tanamakanij itech itemplo Dios.
Yejua nejin kikualantij Jesús. Yejika kinixkepak mesas kampa yetoya taxtauil uan kipixoj tomin. No kikuik se kuetaxtamalin uan kinkixtij tapialmej itech templo. Uan kininauatij tein kininamakayaj uiltsitsin: ‘¡Xikinkixtikan! Amo xikchiujtokan ichan noPopaj se kali kampa namotomintiskej’.
Sekin itatojtokakauan Jesús iuan yetoyaj itech templo tein moajsia Jerusalén. Uan kimojkaitakej keman kimouisojkej tein kichiuak Jesús. Ompa, kielnamikkej tein Biblia kijtojka ika kimachiliskia iKoneuj Dios: ‘Netasojtalis tein kipialis ichan Dios kemej eskia kixotaltis’.
Keman Jesús yetoya Jerusalén uan teuantitoya itech Pascua, kichiuak miak mouiskatekimej. Satepan, Jesús kisak Judea uan mokepak Galilea. Sayoj ika panok itech tal tein pouia Samaria. Maj tikitakan toni mochiuak ompa.
