Jesús kichipaua teopan
Historia 89
Jesús kichipaua teopan
NIKAN nesi Jesús melak kualantika, ¿xmelak? ¿Tikmatstika tleka? Pampa yejuin tlakamej akin nemij ipan teopan tlen onka Jerusalén, melak kileuiyaj tomin. Yejuamej kinekij kintominkuaskej akin uajlauej kuajueyichiuaj toTajtsin.
¿Tikimita uakaxkokonej, borregos niman palomas? Yejuin tlakamej kinnemakaj ijtik teopan. ¿Tikmatstika tleka? Pampa israelitas kintekitiltiaj yolkamej niman totomej tlen kiuentlaliliaj toTajtsin.
Itlanauatil toTajtsin kijtouaya ika ijkuak se israelita tlajtlakouaya, nonekiya makimaka toTajtsin se uentli. Niman onkatka okseki tlen ika kitemakayaj uentli. San ika, ¿kanon kominanaskiaj israelitas yejuin totomej niman okseki yolkamej tlen kiuentlaliliskiaj toTajtsin?
Sekimej israelitas kinpiayaj totomej niman yolkamej tlen ueliskiaj tetlayokoliskej. San ika, oksekimej xtlaj kipiayaj. Noijki pampa oksekimej melak uejka chantiyaj itech Jerusalén xueliyaj kinuajuikayaj iyolkauan kampa teopan. Ika yejon, miyekej uajlauej nikan niman kinkouaj yolkatsitsintin. San ika, yejuin tlakamej melak patioj kinnemakiltiaj, niman kintlachtekiliaj. Yejuamej xkipiayaj ika tlanemakaskej nikan ipan iteopan toTajtsin.
Yejuin tlen kichiua makualani Jesús. Ika yejon, kintlajkali mesas niman kinxinilia intomin. Noijki kontilana se mekatl tlen ika kinuiteki yolkamej niman kinkixtia. Kinnauatia akin kinnemakaj palomas: ‘¡Xkinkixtikan! Maka xtekitiltikan ikal noTaj kampa nemejuamej nenuajmotomintiaj’.
Sekimej inomachtijkauan Jesús iuan nemij ipan yejuin teopan tlen onka Jerusalén. Mojkatlachiaj ijkuak kitaj tlenon kichiua Jesús. Kuakon kilnamikij tlen ipan Biblia onoijkuilo itech iKoneuj toTajtsin: ‘Ika nochi noyojlo niktlakaitas moteopan’.
Ijkuak Jesús nemi Jerusalén kipanoltijtika Pascua, kichiua miyek milagros. Sakin, Jesús kisa itech Judea niman peua yauj Galilea. San ika, panoua itech idistrito Samaria. Matikitakan tlenon kichiua ompa.
