JESU mo o bonagala a galefile kudu, na ga go bjalo? Na o a tseba gore ke ka baka la’ng a galefile ka tsela ye? Ke ka gobane banna ba bao ba lego ka tempeleng ya Modimo mo Jerusalema ba be ba tletše megabaru. Ba be ba leka go hwetša tšhelete e ntši bathong bao ba bego ba etla mo go tlo rapela Modimo.

Na o a di bona dikgomo tše ka moka le dinku le maeba? Banna ba ba be ba rekiša diruiwa tše gona mo tempeleng. Na o a tseba gore ke ka baka la’ng ba be ba dira seo? Ke ka gobane Baisiraele ba be ba nyaka diruiwa tše le dinonyana gore ba direle Modimo dihlabelo.

Molao wa Modimo o be o re ge Moisiraele a dirile sebe, a direle Modimo sehlabelo. Le gona go be go na le dinako tše dingwe tšeo ka tšona Baisiraele ba bego ba swanetše go dira dihlabelo. Eupša Moisiraele o be a tla hwetša kae dinonyana le diruiwa tša go direla Modimo sehlabelo?

Baisiraele ba bangwe ba be ba na le dinonyana le diruiwa. Ka gona ba be ba ka dira dihlabelo ka tšona. Eupša ba bantši ba be ba se natšo. E bile ba bangwe ba be ba dula kgole kudu le Jerusalema gomme ba sa kgone go tla le diruiwa tša bona tempeleng. Ka gona batho ba be ba etla mo ba reka diruiwa goba dinonyana tšeo ba di nyakago. Eupša banna ba ba be ba rekišetša batho dilo tše ka tšhelete e ntši kudu. Ba be ba ba hlalefetša. Le gona, ba be ba se ba swanela go rekišetša dilo mo tempeleng ya Modimo.

Se ke sona seo se ilego sa galefiša Jesu. Ka go re’alo a menola ditafola tša banna bao ke moka a tšholla ditšhelete tša bona. Le gona a dira sefepi sa dithapo gomme a rakela diruiwa ka moka ka ntle ga tempele. A re go banna bao ba bego ba rekiša maeba: ‘Tlošang dilo tše mo! Tlogelang go dira ntlo ya Tate lefelo la go dira tšhelete e ntši.’

Ba bangwe ba balatedi ba gagwe ba be ba na le yena mo tempeleng Jerusalema. Ba ile ba makatšwa ke seo ba ilego ba bona Jesu a se dira. Ke moka ba gopola gore ka Beibeleng go na le moo go bolelwago ka Morwa wa Modimo gore: ‘Go rata ntlo ya Modimo go tla mo dira gore a be le phišego.’

Nako ka moka ya ge Jesu a le mo Jerusalema Pasekeng, o ile a dira mehlolo e mentši. Ka morago ga moo, o ile a tloga Judea gomme a thoma leeto la gagwe la go boela Galilea. Eupša ge a le tseleng ya go ya moo, a phatša seleteng sa Samaria. Anke re bone seo se ilego sa direga moo.

Johane 2:13-25; 4:3, 4.