YESU apa umoneka ngoti wanumana unene, hatyoko? Utyii omokonda yatyi anumanena? Omokonda ovalume ava mondyuo ya Huku mo Jelusalei vena unene elulu. Vaovola okukala nonombongo ononyingi kovanthu veya okufenda Huku.

Weete onongombe ombu no nongi no nopomba? Ovalume vekahi nokulandesila ovipako evi mondyuo ya Huku. Utyii omokonda yatyi? Omokonda ova Isilayeli ankho vesuka novipako pala okulinga ovilikutila ku Huku.

Otyitumino tya Huku ankho tyati, putyina omu Isilayeli umue apengesa, una yokulingila Huku otyilikutila. Tupu ankho pena ononthiki ononkhuavo ova Isilayeli vena yokulinga oviawa. Mahi opi ankho ova Isilayeli vapondola okukapola ovipako pala okuava ku Huku?

Ovaisilayeli vamue ankho vena ovipako viavo muene. Ngotyo, ankho vapondola okupola povipako viavo pala okuava. Mahi, ova Isilayeli ovanyingi ankho vetupu ovipako. Ovakuavo ankho kavapondola okutyinda ovipako viavo kondyuo ya Huku mokonda ankho vakala kokule unene no Jelusalei. Moluotyo, ovanthu ankho veya mondyuo omu avalande ovipako vesukisa. Mahi, ovalume ava ankho veveita onombongo ononyingi. Ankho vavaka ovanthu. Tupu ankho kavapondola okulandesila mondyuo ya Huku.

Otyo Yesu anumanena. Moluotyo, wayendula onomesa mbo valume ankho mbokuna onombongo iya onombongo mbovivela ambuliyandyana. Tupu walinga osikote ataatamo ovipako aviho mondyuo ya Huku. Atumu ovalume ankho valandesa onopomba okuti: ‘Mbupoleimo muno. Yekeipo okulinga ondyuo ya Tate yange omphangu yokulingila ovitanda.’

Ovalongwa vamue va Yesu ankho vekahi nae mondyuo ya Huku mo Jelusalei, vahuva mokuamona etyi Yesu ankho ekahi nokulinga. Iya avahinangela onthele imue mo Mbimbiliya yapopia kombinga Yomona wa Huku, yati: ‘Ohole nondyuo ya Huku maiteme mokati kae ngotupia.’

Puetyi Yesu ankho ekahi mo Jelusalei ko Pasikwa, walinga omahuviso omanyingi. Konyima, Yesu watunda ko Judeia ahimbika oungendi wae wo kukondoka ko Galileia. Mahi, mondyila wakuata ko Samaria. Tutalei oityi tyapitileko.