Yesu Okuboneza Hekalu
Ekitebyo 89
Yesu Okuboneza Hekalu
YESU buzimazima aha naareebeka aine ekiniga, tikwo? Noomanya ahabw’enki aine ekiniga kingi? N’ahabw’okuba aba bashaija omu hekalu ya Ruhanga omuri Yerusaalemu baine omururu mwingi. Nibagyezaho kukora esente nyingi kuruga aha bantu abaizire hanu kuramya Ruhanga.
Nooreeba ezo nyena n’entaama n’enkombe? Abashaija nibaguriza aga matungo hanu omuri hekalu. Noomanya ahabw’enki? N’ahabw’okuba Abaisraeli nibetenga amatungo n’enyonyi kubihongyera Ruhanga.
Eiteeka rya Ruhanga rikaba nirigira ngu Omuisraeli ku araakore ekibi, ashemereire kuhayo empongano ahari Ruhanga. Kandi hakaba hariho obundi bunaku, obu Abaisraeli baabaire bahayo empongano. Kwonka shi Omuisraeli akaba aiha nkahi ebinyonyi n’amatungo eby’okuhongyera Ruhanga?
Abaisraeli abamwe bakaba batungire ebinyonyi hamwe n’enyamaishwa. N’ahabw’ekyo bakaba bahayo ebi. Kwonka Abaisraeli baingi bakaba bataine matungo nari enyonyi. Kandi abandi bakaba nibatuura hare munonga na Yerusaalemu batari kubaasa kureeta matungo gaabo omu hekalu. N’ahabw’ekyo abantu bakaba baija aha bagura amatungo n’enyonyi ebi baabaire nibetenga. Kwonka aba bantu bakaba nibashaba esente nyingi munonga. Bakaba nibaiba abantu. Oyihireho ekyo, tibashemereire kuba nibaguriza ebintu hanu omuri hekalu ya Ruhanga.
Eki nikyo kyaitsa Yesu ekiniga. Atyo nikwo kujuumika emeeza z’abashaija ezaabaire ziriho empiiha kandi empiiha zaabo zikataataana. Atyo akwata emiguha agigira nk’orukoba reero abinga amatungo goona kuruga omuri hekalu. Aragiira ati abashaija abarikuguza enkombe: ‘Mwiheho ebi aha! Enju ya Tata murekye kugihindura ey’okukoreramu esente nyingi.’
Bamwe aha bakuratsi ba Yesu bari hamwe nawe aha omu hekalu omuri Yerusaalemu. Baatangaara okureeba eki Yesu yaakora. Baijuka ahi kihandiikirwe omuri Baibuli ahari kugamba hati aha Mwana wa Ruhanga: ‘Rukundo y’enju y’ishe eryamwakamu nk’omuriro.’
Yesu ari aha omuri Yerusaalemu omu bugyenyi bw’okuhingurwaho, akakora eby’okutangaaza bingi. Bwanyima, Yesu yaaruga Buyudaaya yaatandika orugyendo rwe kugaruka Galilaaya. Kwonka omu rugyendo rwe, yaaraba omu ishaza rya Samaria. Ka tureebe ekyabaireho okwo.
