HESUS ta parse hopi rabiá, no ta bèrdat? Bo sa pakiko? Pasobra e hendenan ei den e tèmpel di Dios na Yerusalèm ta masha golos pa plaka. Nan ta purba gana hopi plaka di hende ku ta bai einan pa adorá Dios.

Bo ta mira tur e baka yònnan i karné i palomba? Wèl, e hòmbernan ta bende e bestianan ei den e tèmpel mes. Bo sa pakiko? Dor ku e israelitanan tin mester di bestia pa ofresé komo sakrifisio na Dios.

E lei di Dios a bisa ku ora un israelita hasi malu, e mester a hasi un sakrifisio na Dios. I na algun otro okashon tambe e israelitanan mester a hasi sakrifisio. Pero unda e israelitanan por a haña bestia pa ofresé na Dios?

Algun israelita tabata kria bestia, ku nan por a ofresé. Pero hopi israelita no tabata kria bestia. I otronan tabata biba asina leu for di Yerusalèm ku nan no por a bini ku nan mes animal na e tèmpel. P’esei, nan tabata bini einan i kumpra para òf otro bestia pa sakrifiká. Pero e hòmbernan golos aki tabata kobra e hendenan muchu hopi plaka. Nan tabata hòrta e hendenan. Ademas, nan no tabatin mag di bende kos mes ei den e tèmpel di Dios.

Esei a hasi Hesus rabia. P’esei el a bòltu mesa di e hendenan ku e plaka i a plama nan sèn. Tambe el a traha un zuip di kabuya i a kore ku tur e bestianan for di den e tèmpel. El a bisa e bendedónan di palomba: ‘Saka nan for di aki! Stòp di hasi e kas di mi Tata un lugá di negoshi.’

Algun siguidó di Hesus tabata huntu kuné den e tèmpel na Yerusalèm. Nan a keda sorprendí di loke nan a mira Hesus hasi. Anto nan a kòrda e palabranan den Beibel ku ta bisa di e Yu di Dios: ‘Amor pa e kas di Dios lo kima den dje manera kandela.’

Miéntras Hesus tabata ei na Yerusalèm asistiendo na e Pasku Hudiu, el a hasi hopi milager. Despues, Hesus a sali for di Hudea i a kuminsá su biahe di regreso pa Galilea. Pero, riba kaminda el a pasa dor di e distrito di Samaria. Laga nos mira kiko a sosodé ei.

Juan 2:13-25; 4:3, 4.