LUKIM Jesus. Hem luk kros fogud, iaman? Waswe, iu savve why nao hem barava kros? Hem from olketa man hia long temple bilong God long Jerusalem greedy tumas. Olketa trae for kasem plande selen from pipol wea kam long hia for worshipim God.

Waswe, iu lukim evri young buluka and sheep and kurukuru? Olketa man hia salem olketa animal hia long temple. Waswe, iu savve why? Hem from olketa Israelite needim olketa animal and bird for sakrifaesim long God.

Law bilong God sei taem wanfala Israelite hem duim rong samting, hem mas givim wanfala sakrifaes long God. And samfala narataem tu olketa Israelite mas givim olketa sakrifaes. Bat wea nao wanfala Israelite savve kasem olketa bird and animal for sakrifaesim long God?

Samfala Israelite garem olketa bird and animal. So olketa savve sakrifaesim olketa hia. Bat plande Israelite no garem eni animal or bird bilong olketa seleva. And olketa narawan stap farawe tumas from Jerusalem so hem hard for olketa tekem kam eni animal bilong olketa long temple. So olketa pipol kam long hia and peim olketa animal and bird wea olketa needim. Bat olketa man hia salem long hae price tumas. Olketa ravem olketa pipol. And tu, olketa no fit for salem olketa animal hia insaed long temple bilong God.

Diswan nao samting wea mekem Jesus kros. So hem kapsaetem tebol bilong olketa man hia and evri selen bilong olketa foldaon olobaot. And tu, hem mekem wanfala whip from rope and raosem evri animal from temple. Hem komandim olketa man wea salem olketa kurukuru: ‘Tekem olketa aot from hia! No mekem haos bilong Dadi bilong mi olsem ples for kasem selen.’

Samfala follower bilong Jesus stap witim hem long temple long Jerusalem. Olketa sapraes for lukim samting wea Jesus duim. Then olketa rememberim samting wea Bible talem abaotem Son bilong God: ‘Love for haos bilong God bae bone olsem fire insaed long hem.’

Taem Jesus attendim Passover long hia long Jerusalem, hem duim plande mirakol. Bihaen, Jesus lusim Ju·deʹa and start for wakabaot go bak long Galʹi·lee. Bat taem hem go, hem go thru long Sa·marʹi·a. Bae iumi lukim samting wea happen long there.