CHAWILAMPEʼ ri Jesús sibʼalaj petinäq royowal, ¿la qastzij? ¿La awetaʼm suche? Rumal che wa täq achijabʼ che e kʼo pa ri loqʼalaj ja rech ri Ajawaxel pa Jerusalén are kkaj pwäq. Tijan kkaj kkesaj nim pwäq chike ri winaq kepe waral che uyaʼik uqʼij ri Ajawaxel.

¿La kawil ri täq chij xuqujeʼ täq palomax xuqujeʼ nikʼaj chik chiköp e kʼo pa ri wachbʼäl? Wa täq achijabʼ tijan kkekʼayij waral pa ri loqʼalaj ja. ¿La awetaʼm suche? Are rumal che ri täq israelitas rajawaxik chike kkekoj wa täq chiköp che tabʼal toqʼobʼ chuwäch ri Ajawaxel.

Ri utaqonik ri Ajawaxel kubʼij che we jun israelita kubʼan umak, rajawaxik kukoj jun tabʼal toqʼobʼ chuwäch ri Ajawaxel. Xuqujeʼ ri täq israelitas rajawaxik che kkekoj ri täq kitabʼal toqʼobʼ konojel weneʼ, o patneʼ, kʼot kimak kibʼanom. Tekʼuriʼ, ¿jachiʼ kkeriq wi ri täq chiköp rech wa täq tabʼal toqʼobʼ?

Jujun chike ri winaq kʼo ke ri täq chiköp rech kkeya che tabʼal toqʼobʼ. Tekʼuriʼ kʼi täq israelitas kʼot chiköp kukʼ. Xuqujeʼ nikʼaj chik che naj kʼo wi ri kachoch che Jerusalén rumal laʼ kekun täj kkekʼam lo jun chiköp pa ri loqʼalaj ja. Rumal laʼ ri winaq kepe waral kkeloqʼ ri täq chiköp. Tekʼuriʼ wa täq achijabʼ sibʼalaj nim pwäq kketa chirij wa täq chiköp. Xa kkelqʼaj ri kipwäq ri winaq. Xuqujeʼ, utz täj che kkebʼan kikʼay waral pa ri loqʼalaj ja rech ri Ajawaxel.

Rumal wariʼ sibʼalaj xpe royowal ri Jesús. Rumal laʼ xukʼaqabʼej ri täq mesas xuqujeʼ ri pwäq. Xuqujeʼ xubʼan jun chʼiybʼal rukʼ kolobʼ tekʼuriʼ xeʼuresaj bʼi ri täq chiköp. Xubʼij wariʼ chike ri ajkʼayil täq palomax: ‹¡Cheʼiwesaj bʼi waral! Xchaʼ. Xaq mibʼan che ri rachoch ri Nutat jun kʼaybʼal jachiʼ ktzukux wi nim pwäq›.

Jujun täq rajtijoxelabʼ ri Jesús e kʼo rukʼ waral pa ri loqʼalaj ja rech Jerusalén. Xkexibʼij kibʼ chiʼ xkil ri tijan kubʼan Jesús. Tekʼuriʼ xsach ta pa kijolom ri kubʼij ri Loqʼalaj Pixabʼ chirij ri Ukʼojol ri Ajawaxel: ‹Ri loqʼoqʼenik che ri rachoch ri Ajawaxel kʼo rukʼ junam che jun qʼaqʼ›.

Chiʼ Jesús kʼo Jerusalén pa ri nimqʼij rech Pascua, xubʼan kʼi täq milagros. Tekʼuriʼ, Jesús xel lo Judea rech kbʼe Galilea. Tekʼuriʼ xqʼax bʼi pa Samaria. Chqilampeʼ su kbʼan chilaʼ.