JESUSQA piñasqallañam dibujopi kachkan, ¿aw? ¿Yachankichu imanasqa? Jerusalen llaqtapi Diospa templonpi qawasqayki runakunamá qollqe kuyaruqlla kanku. Chaymi templopi Diosta yupaychanankupaq riq runakunapa qollqenkuta qechurunankupaq achka qollqepaq chaninpim rantikunku.

¿Rikuchkankichu malta torokunata, ovejakunata chaynataq palomakunatapas? Kay runakunaqa, Diospa templonpipunim chaykunata rantikuchkanku. ¿Yachankichu imanasqa? Israel casta runakunamiki uywakunata hinaspa urpikunatapas wañuchispa Diospaq kañapunanku.

Diospa leyninqa kamachikurqa Israel casta runakunamanta pipas huchallikuptinqa Diosman ofrendata kañapunanpaq. Ichaqa manam chayllachu, huk kutikunapipas Israel casta runakunaqa Diosman ofrendakunata qonanku karqa. Chaynaqa ¿maypimá ofrendata ruranankupaq uywakunata chaynataq urpikunatapas tarinmanku?

Wakin runakunapaqqa uywankuna chaynataq urpinkunapas karqapunim. Israel runakunamanta wakinkunapañataqmi ichaqa manam uywanku nitaq urpinkuqa kapurqachu. Wakinkunañataqmi Jerusalenmanta karu llaqtapiraq kawsakurqaku hinaspa templokamaqa manam uywataqa qatiyta atirqakuchu. Chaymi runakunaqa kayman hamuspanku uywakunata otaq urpikunatapas rantiqku. Templopi rantikuq runakuna ichaqa achka qollqepaq chanintam imatapas rantikunku. Chaynata ruraspankum runakunata suwakurqaku. Hinaptinpas, manamá Diospa templonpiqa rantikunankuchu.

Chaymi Jesustaqa sinchita piñarachirqa. Hinaptin Jesusqa wikaparqam qollqe cambiananku mesakunatapas qollqenkutapas tallirurqa. Hinaspam waskamanta latigota rurakuykuspa templomanta lliw uywakunata qarqorurqa. Palomakuna rantikuqkunatañataqmi nirqa: ‘¡Kaykunata horqowaychik kaymanta! Taytaypa wasintaqa amayá qatu wasitaqa ruraychikchu’ nispa.

Jesuspa wakin discipulonkunapas paywanmi Jerusalen llaqtapa templonpi kachkanku. Hinaptinmi Jesuspa rurasqanta qawaspanku admirakurqaku. Chaymi yuyarirurqaku Bibliapi Diospa Churinmanta kayna niqta: ‘Sinchitam sientinqa Diospa wasinmantaqa’ nispa.

Hinaptinmi Jerusalenpi Pascua fiestapi kaspanmi rurarqa achkaq milagrokunata. Chaymantañam Jesusqa Judea lawmanta Galilea lawman kutikurqa. Kutispanmi Samaria lawninta pasarqa. Yachasunchikyá imataq chaypi Jesus rurarqa.