YESUUSI koye lowo geeshsha hanqinoha lawanno; dihattooti? Isi togo ikke hanqinohu mayiraatiro afootto? Korkaatuno Yerusaalamete Maganu mine noori kuri mannooti hafuuraamma ikkitino daafiraati. Kuri mannooti Magano magansiˈrate hakka marino manniwiinni lowo woxe duuˈnitara woˈnaaltanni no.

Misilete aana noore bootta, gereewonna lemboola baalanka laitto? Mannootu tenne saada Maganu mini giddo daddaltanni no. Hakko daddaltanni noohu mayiraatiro afootto? Isiraeelete manni saadanna cea Maganoho kakkalara hasiˈranno daafiraati.

Maganu seeri mittu Isiraeelete manchi soˈro loosiro, Maganoho kakkalo shiqisha hasiissannosita coyiˈranno. Isiraeele Maganoho kakkalo shiqisha hasiissannonsati wole yannano no. Ikkina Isiraeele Maganoho kakkaltanno saadanna cea hiikkiinni afidhanno?

Mitu mitu Isiraeelete mannira ceanna saada noonsa. Konni daafira noonsahu giddonni kakkala dandiitanno. Ikkollana rooru Isiraeelete manni cea woyi saada diafiˈrino. Wolootu qolte Yerusaalametenni lowo geeshsha xeertidhe heedhanno daafira, saadansa Maganu minira abba didandiitanno. Konni daafira Yerusaalame dagge hasidhanno saadanna cea hidhitanno. Hirtanno mannooti kayinni lowo woxira hirtanno. Mannuwiinni lowo woxe gudhitanni no. Qoleno Maganu mini giddo daddaˈla dihasiissannonsa.

Yesuusi hanqinohu iseraati. Konni daafira mannootu woxi noo xaraphpheeyye kare gudi; hattono saantuwansa finci. Qoleno halange seekkire Maganu mininni baalanta saada shorre gudi. Lemboola hirtanni noo mannoota togo yee hajaji: ‘Fushshe kawiichchinni! Anniˈya mine daddalu bayichcho assitinoonte.’

Gamu Yesuusi harunsaano isi ledo koye Yerusaalamete Maganu mine no. Insara Yesuusi assanna laˈino coyi xagge ikkinonsa. Hakkiinnino Maganu Beetto lainohunni Qullaawu Maxaafi giddo togo yaanno bayichchi qulli yiinsa: ‘Maganu minira noosi baxilli giirate gede itannosi.’

Yesuusi Yerusaalamete Faasiku ayyaana ayirrisanni keeshshi yannara lowo maalale assino. Gedensaannino Yihudunni kae Galiila haˈri. Hakkiira haˈri wote, Samaariyu awuraajji widoonni hige haˈrino. Samaariyaho ma assinoro hanni laˈno