ETAKANI cut bala enyunyura Yesu kane, mam cut? Ijeni jo kanukinyo? Erai naarai itunga luejaasi oyekalu loka Edeke lo ejai Yerusalem irangaka noi. Etamito kesi adumum isirigin luipu kotunga lueponito ne aima Edeke.

Ianyut jo imongin ka amerekekin ka ajeleik? Egwelanarete itunga itiang lu kotoma oyekalu. Ijeni ijo kanukinyo? Naarai ipudas Isiraelin itiang ka ikweny kanu ainakin Edeke asubanit.

Abala ekisil loka Edeke ebe kediaka Isiraelit, ibusakinnit nges ainakin Edeke asubanit. Ajaas aciepakio, da nukejanakinata Isiraelin asuban. Konye aibo ti kedumaki Isiraelit ikweny ka itiang kanu ainakin Edeke?

Ajatar icie Isiraelin kikweny ka itiang. Aso apedorete ainakin lu kwape asubanit. Konye luipu amameatar kitiang arai ikweny. Icie eboiete kane elwana anyoun ko Yerusalem aso mam apedorete ayaun idiopet kotiang kec kiton oyekalu. Aso apote itunga ne kosodete agwela itiang arai ikweny luipudas kesi. Konye ekiaritos itunga lu etiai kuju noi. Amodete itunga. Keja ngun da, mam kes ibusakinit agwelanar kotoma oyekalu loka Edeke.

Kitakadikis nu Yesu. Aso kobuburiana imesanakec kabukor da isirigin kec. Aso kosub erikot kaunoi, kirengea itiang kere ko yekalu. Kicorak itunga lukegwelanarete ajeleik ebe: ‘Kolemasi kesi kinga! Sirikituluosi etogo loka Papaka araut aibois nakiswamaere isirigin luipu.’

Ikatupitok icie luka Yesu ejaas kanges oyekalu ko Yerusalem. Eumokitos nuanyutu Yesu iswamai. Kanen kiitut ebe iwadikatai nuka okoku loka Edeke atiar: ‘Amin etogo loka Edeke enoki ka mamake bala akim.’

Nakejaar Yesu Yerusalem opucit loka Aleleng, kiswama aumonokineta nuipu. Ekaulo, kinyeik Yesu Yudaya kobongo Galilaya. Konye korotoke,kitor kiding Samaria. Aanyutu nunyoika iswamas kangina.