89-нҗы хекая

Иса ыбадатхананы арассалаяр

ИСА бу ерде гахарлы гөрүнйәр герек? Себәбини билйәңми? Ол Худайың ыбадатханасындакы ачгөз адамлара гахарланяр. Олар Худая сежде этмәге гелен адамлар аркалы көп пул газанҗак болярлар.

Суратдакы сыгырлары, гоюнлары хем-де кепдерилери гөрйәңми? Бу адамлар олары эдил ыбадатхананың ичинде сатярлар. Билйәңми нәме үчин? Себәби Худая гурбан бермек үчин ысрайыллылара мал герекди.

Худайың канунында, эгер-де ысрайыллы адам эрбет иш эден болса, онда онуң Худая гурбан бермелидиги барада айдыляр. Ысрайыллы адам башга себәплер боюнча хем гурбан бермелиди. Йөне Худая гурбан бермек үчин гушы я-да малы ниреден алмалыды?

Кәбир ысрайыллыларың гурбан бермәге гушдур маллары барды. Йөне көпүсиниң не малы, не-де гушы барды. Кәбир ысрайыллылар болса, Иерусалимден узакда яшаярды. Шонуң үчин малыны ыбадатхана гетирмек кын болярды. Шол себәпли адамлар герек малы я-да гушы эдил шу ерден сатын алярды. Эмма сатыҗылар адамлардан көп пул алярды. Олар адамлары алдаярды. Онсоңам, олар Худайың ыбадатханасында хич зат сатмалы дәлди.

Ине, шонуң үчинем Иса гаты гахарланды. Ол пул чалышянларың столларыны йыкып, пулларыны дөкйәр. Шейле-де йүпден бир гамчы өрүп, малларың барыны ыбадатханадан ковяр. Кепдери сатянлара болса: «Булары бу ерден әкидиң, Атамың өйүни базара өвүрмәң» дийип буюряр.

Иерусалимдәки ыбадатхана Иса билен бирнәче шәгирди-де гелипди. Олар Исаның эдйән ишине хайран галярлар. Шонда оларың ядына Зебурда Худайың Оглы барада: «Худайың өйүне сөйги өз гүнүме гоянок» диен сөзлер дүшйәр.

Пасха байрамында Иса Иерусалимде көп гудратлар гөркезйәр. Байрамчылыкдан соң, ол Яхудадан Җелилә доланяр. Ёлда Иса Самария велаятының үсти билен гечйәр. Бу ерде нәме боланыны билели.

Яхя 2:13—25; 4:3, 4.