‘IKAI ‘oku hā ngali ‘ita mo‘oni ‘a Sīsū ‘i heni? ‘Okú ke ‘ilo pe ko e hā ‘okú ne fu‘u ‘ita pehē aí? Koe‘uhi he ko e kau tangata ko ‘eni ‘i he temipale ‘o e ‘Otuá ‘i Selusalemá na‘a nau fu‘u mānumanu. Na‘a nau feinga ke ma‘u ha pa‘anga lahi mei he kakai ‘oku nau ōmai ke lotu heni ki he ‘Otuá.

‘Okú ke sio ki he fanga pulu mui mo e fanga sipi mo e fanga lupé kotoa? Na‘e fakatau atu ‘e he kau tangata ko ‘ení ‘a e fanga monumanu ko ‘ení ‘i he temipalé tonu pē. ‘Okú ke ‘ilo ‘a hono ‘uhingá? Ko hono ‘uhingá he na‘e fiema‘u ki he kau ‘Isilelí ‘a e fanga monumanú mo e fanga manupuná ke fai feilaulau‘aki ki he ‘Otuá.

Na‘e pehē ‘e he lao ‘a e ‘Otuá ka faihala ‘e ha ‘Isileli, ‘oku totonu ke ne fai ha feilaulau ki he ‘Otuá. Pea na‘e ‘i ai mo e ngaahi taimi kehe foki na‘e fiema‘u ai ki he kau ‘Isilelí ke nau fai ‘a e ngaahi foaki. Ka na‘e malava ke ma‘u mei fē ‘e he kau ‘Isilelí ha fanga manupuna mo e fanga manu ke foaki ki he ‘Otuá?

Na‘e ma‘u ‘e he kau ‘Isileli ‘e ni‘ihi ‘a ‘enau fanga manupuna mo ‘enau fanga manu ‘anautolu pē. Ko ia na‘e lava ke nau foaki ia. Ka ko e tokolahi ‘o e kau ‘Isilelí na‘e ‘ikai ke ‘i ai ha‘anau fanga monumanu pe fanga manupuna ‘anautolu. Pea na‘e nofo ‘a e ni‘ihi ‘o fu‘u mama‘o ‘aupito mei Selusalema ‘o ‘ikai ke lava ke nau ‘omai ha taha ‘o ‘enau fanga monumanú ki he temipalé. Ko ia na‘e ha‘u pē ‘a e kakaí ki heni ‘o fakatau ai ‘a e fanga monumanu pe fanga manupuna na‘a nau fiema‘ú. Ka na‘e fu‘u lahi ‘a e pa‘anga na‘e ‘eke ‘e he kau tangata ko ‘ení mei he kakaí. Na‘a nau kākaa‘i ‘a e kakaí. ‘Ikai ko ia pē, ka na‘e ‘ikai ke totonu ke nau fakatau ‘eni ‘i he temipale ‘o e ‘Otuá.

Ko e me‘a ia na‘e ‘ita lahi ai ‘a Sīsuú. Ko ia na‘á ne fulihi ‘a e ngaahi tēpile ‘a e kau tangatá mo ‘enau pa‘angá pea movete ‘a ‘enau ngaahi fo‘i pa‘angá. Pea na‘á ne ngaohi foki mo ha uipi mei ha ngaahi maea ‘o tuli‘aki ‘a e fanga monumanu kotoa ki tu‘a mei he temipalé. Na‘á ne tu‘utu‘uni ki he kau tangata ‘oku nau fakatau atu ‘a e fanga lupé: ‘ ‘Ave kinautolu mei heni! Tuku hono ‘ai ‘a e fale ‘o ‘eku Tamaí ko ha fakatupu‘anga pa‘anga.’

Na‘e ‘i he temipalé ‘i Selusalema fakataha mo Sīsū ‘a e ni‘ihi ‘o ‘ene kau muimuí. Na‘a nau ofo ‘i he‘enau sio ki he me‘a na‘e fai ‘e Sīsuú. Pea nau toki manatu‘i ‘a e konga ‘i he Tohitapú ‘a ia ‘oku pehē ai ‘o fekau‘aki mo e ‘Alo ‘o e ‘Otuá: ‘⁠Ko e ‘ofa ki he fale ‘o e ‘Otuá ‘e vela ‘o hangē ha afi ‘i loto ‘iate ia.’

‘I he lolotonga ‘o e ‘i Selusalema ‘a Sīsū ke kau ki he Lakaatú, na‘á ne fai ai ha ngaahi mana lahi. Hili ia, na‘e mavahe atu ‘a Sīsū mei Siutea ‘o kamata ‘ene fononga ‘o foki ki Kāleli. Ka ‘i he‘ene fonongá, na‘á ne fou atu ‘i he vahefonua ko Samēliá. Tau sio ange pe ko e hā na‘e hoko ‘i aí.