JESU ulibonya kukalala aawa, hena tabusyi? Hena ulicizyi capa kuti akalale boobu? Nkaambo kakuti bantu aaba bali atempele lya Leza mu Jelusalemu, mbalyatu kapati. Bayanda kuti kabajana mali manji kubantu baboola kokuno kuzyi kukomba Leza.

Hena wababona boonse aaba basune, mbelele ankwilimba? Bantu aaba bauzya zivwubwa eezyi mpeena aano atempele. Hena ulikazyi kaambo? Nkaambo kakuti bana Isilayeli bayanda ŋombe, mbelele ankwilimba zyakupaizya kuli Leza.

Imulawo wa Leza wakati, ikuti muna Isilayeli wabisya, weelede kupa cipaizyo kuli Leza. Alimwi kwakali ziindi azimwi muna Isilayeli naakeelede kupa cipaizyo. Pele ino nkuli muna Isilayeli nkwaakali kukonzya kujana nkwilimba, ŋombe naa mbelele zyakupa kuli Leza?

Bana Isilayeli bamwi bakali vwubide nkwilimba, ŋombe ambelele. Aboobo bakali kukonzya kupaizya eezyi. Pele bunji bwabana Isilayeli tiibakajisi ŋombe naa mbelele nizyiba nkwilimba. Alimwi bamwi bakali kukkala kulamfwu cakuti tiibakali kukonzya kuleta ŋombe naa mbelele kutempele. Aboobo bantu bakali kuboola kuno ikuula ŋombe, mbelele naa nkwilimba nzyobakali kuyanda kupaizya. Pele bantu aaba bakali kubadulisya. Bakali kubanyengelela bantu. Akamwi kaambo nkakuti, tiibakeelede kuuzyila mutempele lya Leza.

Eeci ncecakapa kuti Jesu akalale. Aboobo waabbindamuna matebulu aabo aajisi mali, eelyo mali aile kuwuumuka ansi. Alimwi woosa ciswipu eelyo wazyibinga ŋombe ambele zyoonse kuzwa mutempele. Wati kubantu bauzya nkwilimba: ‘Amuzyigusye eezyi muno! Amuleke kucita ŋanda ya Taata kuba busena bwakujanina mali manji.’

Ibamwi basikwiiya ba Jesu bali limwi muno mutempele mu Jelusalemu. Balamwa kubona Jesu ncacita. Kumane bayeeya zilembedwe zyamu Bbaibbele zyaamba Mwana wa Leza kuti: ‘Luyando lwaŋanda ya Leza luya kuyaka muli nguwe mbuli mulilo.’

Jesu kali mu Jelusalemu kulindila Pobwe lya Kwiindilila, wacita maleele manji. Kumane Jesu wazwa mu Judaya akutalika kweenda kujokela ku Galilaya. Pele keenda kuya kumunzi, wainda amucisi ca Samaliya. Atubone cicitika ooko.

Johane 2:13-25; 4:3, 4.