¿ANKE jel tajkel wa x-ilxi ja Jesús ja bʼa dibujo? ¿Wan maʼ xa naʼa jas yuj? Yujni ja winik matik teye bʼa stemplo ja Dyos, bʼa Jerusalén, jel x-okʼ skʼujole ja takʼini. Ja yuj wane slejel modo bʼa oj yaweʼel yi jitsan takʼin ja matik wa xjak yawe yi stoyjel ja Dyos bʼa templo.

¿Wan maʼ xa wila ja wakaxik, ja chejik soka pichonik bʼa dibujo? Ja winike it tini wane xchonjel bʼa templo. ¿Wan maʼ xa naʼa jas yuj? Yujni ja israʼelenyo jumasaʼ wa xmakuni yujile ja chanteʼik bʼa oj yawe yi ja Dyos jastal majtanal.

Ja smandar ja Dyos wa xyala yajni jun israʼelenyo wa skʼulan jun jasunuk bʼa mi lekuk, ojni yaʼ yi jun majtanal ja Dyos. Chomajkil ja israʼelenyo tʼilani wa xyawe yi majtanal ja Dyosi. Pe ¿bʼaxa oj staʼe chanteʼik bʼa oj skʼap-e yi ja Dyosi?

Jujuntik bʼa yeʼnle ayni xchanteʼe bʼa oj skʼap-e. Pe jitsan mey yiʼoje. Tuk najat yiʼoje ja Jerusalén sok mi xbʼobʼ yiʼe och bʼa oj skʼap-e yi ja Dyosi. Ja yuj ixuk winik ti wa xjakye bʼa templo bʼa oj sman-e ja chanteʼiki. Pe ja winike matik wa xchonowe bʼa templo jel chaʼan stsʼakol skʼanawe. Wa xyelkʼane ja ixuk winiki. Chomajkil mini xbʼobʼ xchon-e bʼa templo.

Ja it jaʼ aji tajkuk ja Jesús. Ja yuj ja yeʼn chʼak sjutbʼuk-el ja mesaʼik bʼa kajan ja stakʼineʼi sok saktantan chʼak wajuk. Chomajkil skʼulan jun stsʼuʼum sok chʼak ya eluk ja chanteʼik ja bʼa templo. Sok yala yabʼ ja matik wa xchonowe ja pichoniki: «¡Awik eluk ja jastik junuk it! Awikan skʼulajel ja snaj ja jTat jun lugar bʼa wa xjaka leʼex jitsan takʼin».

Jujuntik ja bʼa snebʼuman ja Jesús teye sok ja yeʼn bʼa templo bʼa Jerusalén. Chamyilawe ja jas skʼulan ja Jesús. Anto ti julskʼujole ja jas wa xyala ja Biblia sbʼaja Yunin ja Dyosi: «Ja yajtanel yiʼoj yuja snaj ja Dyos lajansok kʼakʼ wan ajlel ja bʼa skʼujoli».

Yajni titoʼay bʼa Jerusalén bʼa skʼintajel ja Pascua, Jesús skʼulan jitsan senya. Tsaʼan, Jesús el ja bʼa Judea sok ti kumxi bʼa Galilea. Pe ti ekʼ bʼa slujmalil Samaria. La kiltik jasa ekʼ ja tiw.