JESU i woneka ku khwatsi i zangarile hakunene laha, a hi zona? Wa zi tiva a ku hikuyini a zangarileko nguvu? Hi lezaku a vavanuna lava va nga tempeleni ya Nungungulu lomu Jerusalema vanhu va makangwa nguvu. Vona vo zama ku bhinzula mali yo tala hi ka vanhu va tako laha va ta khozela Nungungulu.

Wa ti wona a tihomu tontlhe leti zinwe ni tiyivu ni matuva? Ina, a vavanuna lava vo xavisa a zifuyo lezi kwalaha tempeleni ha koce. Wa zi tiva a ku hikuyini? Hi lezaku a vaIsraeli va lava zifuyo ni zinyanyani kasi ku phahlela ka Nungungulu.

A nayo wa Nungungulu wu te ngalo loku a muIsraeli a onha, i wa fanele ku maha munyikelo ka Nungungulu. Niku ku wa hi ni zinwani zikhati, kambe, laha a vaIsraeli va nga fanele ku maha minyikelo. Kanilezi a muIsraeli i wa ta zi kuma kwihi a zinyanyani ni zifuyo kasi ku a nyikela ka Nungungulu?

A vaIsraeli vanwani va wa hi ni zinyanyani hambu ni zifuyo. Hikwalaho va wa zi kota ku nyikela zalezo. Kanilezi a vaIsraeli vo tala va wa nga hi na zifuyo kutani zinyanyani. Ni lezaku vanwani va wa hanya kule nguvu ni Jerusalema kasi ku neha a xinwe xa zifuyo zabye laha tempeleni. Hikwalaho a vanhu va wata laha va ta xava a zifuyo kutani zinyanyani lezi va nga zi lava. Kanilezi a vavanuna lava va wa tekela vanhu a mali yo tala nguvu. Vona va wa kanganyisa vanhu. Ahandle ka lezo, va wa nga faneli ku xavisa kwalaha tempeleni ya Nungungulu ha koce.

Lezo hi zona zi mahako Jesu a zangara nguvu. Hizalezo yena i khubhunyeta a timeza ni mali ya vavanuna lavo a tlhela a hangalasa a zingerengere zabye. Kambe, yena i maha a limhika hi tingoti a hlongola a zifuyo zontlhe hi lomu tempeleni. Yena i laya a vavanuna lava va xavisako matuva aku: ‘Ma suseni lomu! Mu nga mahi yindlu ya Dadani wa mina yiva wutshamu go bhinzulela kona mali yo tala.’

A valanzeli vo kari va Jesu va na yena kwalaha tempeleni lomu Jerusalema. Vona va hlamala hi ku wona lezi Jesu a mahako. Makunu vona va alakanya a wutshamu lomu ka Biblia laha gi wulako xungetano hi N’wana wa Nungungulu ku ngalo: ‘A liranzo lakwe hi yindlu ya Nungungulu li ta vura nzeni kakwe a ku fanana ni nzilo.’

Laha Jesu a ha hiko mubuzweni wa Pasika laha Jerusalema, i maha zihlamaliso zo tala. Anzhako ka lezo, Jesu i suka Judia a sangula a pfhumba gakwe go tlhelela Galilea. Kanilezi lomu ndleleni yakwe, i hunza hi mugangeni wa Samaria. A hi woneni lezi zi mahekako laho.