YESU wakuwoneka wakukwiya comene pa cithuzithuzi ici, kasi ni nthena yayi? Kasi ukumanya cifukwa ico wakwiyira nthena? Nchifukwa cakuti ŵanalume awo ŵakaŵa mu tempele la Ciuta mu Yerusalemu ŵakaŵa ŵazukusi comene. Ŵakakhumbanga kusanga ndarama zinandi kufuma ku ŵanthu awo ŵakizanga kuzakasopa Ciuta.

Kasi ukuziwona ng’ombe na mberere na nkhunda pa cithuzithuzi apa? Ŵanthu aŵa ŵakuguliska viŵeto ivi muno mu tempele. Kasi ukumanya cifukwa cake? Nchifukwa cakuti Ŵaisrayeli ŵakakhumbikwiranga nyama na viyuni kuti ŵapeleke sembe kwa Ciuta.

Dango la Ciuta likati para Muisrayeli wananga, wakwenera kupeleka sembe kwa Ciuta. Ndipo pakaŵaso nyengo zinyake apo Ŵaisrayeli ŵakeneranga kupeleka sembe. Kweni kasi ni nkhu uko Ŵaisrayeli ŵakatoranga viyuni na nyama kuti ŵapeleke sembe kwa Ciuta?

Ŵaisrayeli ŵanyake ŵakaŵetanga viyuni na nyama. Ntheura ŵakapelekanga viŵeto ivi. Kweni Ŵaisrayeli ŵanandi ŵakaŵavya viŵeto vilivyose. Ndipo ŵanyake ŵakakhalanga kutali comene na Yerusalemu mwakuti ŵakatondekanga kukhwema viŵeto vyawo kuluta navyo ku tempele. Mwantheura ŵanthu ŵakizanga kufupi na tempele na kugula nyama panji viyuni ivyo ŵakakhumbanga. Kweni ŵanalume aŵa ŵakachajanga mtengo ukuru comene. Ŵakibiranga ŵanthu. Ndiposo, ŵakeneranga kuguliskira mukati mwa tempele la Ciuta yayi.

Ici ndico cikakwiyiska Yesu. Ntheura wakagadabura mathebulo gha ŵanalume aŵa na kuparanya ndarama zawo. Ndiposo, wakatora cingwe na kuzifumiskira kuwaro kwa tempele nyama zose. Wakaphalira ŵanalume awo ŵakaguliskanga nkhunda kuti: ‘Vifumyanimo muno! Muleke kuzgora nyumba ya Ŵadada ŵane kuŵa ya malonda!’

Ŵasambiri ŵanyake ŵa Yesu ŵakaŵa nayo pa tempele mu Yerusalemu. Ŵakazizwa na ivyo Yesu wakacitanga. Pamanyuma pake ŵakakumbuka vesi linyake mu Baibolo ilo likuyowoya za Mwana wa Ciuta kuti: ‘Phamphu la nyumba ya Ciuta limuryenge petu.’

Peneapo Yesu wakaŵa ku Yerusalemu kucita nawo ciphikiro ca Paska, wakacita minthondwe yinandi. Pamanyuma pake, Yesu wakafumamo mu Yudeya na kwamba ulendo wake wakuwelera ku Galileya. Kweni pakuluta ku Galileya, wakajumpha mu cigaŵa ca Samariya. Tiye tiwone ico cikacitika uku.