HISITOLIA 89
ʼE Fakamaʼa e Sesu Te Fale Lotu
ʼE KOUTOU sio kia Sesu ʼi te paki ʼaenī kua ʼita ʼaupito. ʼE koutou ʼiloʼi pe koʼe ʼe lahi tona ʼita? Koteʼuhi ko te ʼu tagata ʼaia ʼaē neʼe ʼi te fale lotu ʼo te ʼAtua ʼi Selusalemi, neʼe nātou loto mānumānu ʼaupito. Neʼe nātou faiga ke lahi te paʼaga ʼaē ʼe nātou maʼu ʼi te hahaʼi ʼaē neʼe ʼōmai ʼo tauhi ki te ʼAtua.
ʼE koutou sio ki te ʼu vitulo mui pea mo te ʼu ōvi pea mo te ʼu lupe? ʼE fakatau e te ʼu tagata ʼaia te ʼu manu ʼaia ʼi te fale lotu. ʼE koutou ʼiloʼi pe koteā tona tupuʼaga? Koteʼuhi neʼe ʼaoga ki te kau Iselaelite ke ʼi ai hanatou ʼu manu pea mo he ʼu manulele moʼo fai ʼaki tanatou ʼu sakilifisio ki te ʼAtua.
Neʼe ʼui e te lao ʼa te ʼAtua kapau ʼe fai e he Iselaelite he meʼa ʼe kovi, pea ʼe tonu ke ina foaki he mōlaga ki te ʼAtua. Pea neʼe ʼi ai foki mo te tahi ʼu lakaga, ʼaē neʼe tonu ke fai mōlaga ai te kau Iselaelite. Kae neʼe feala ke maʼu ʼifea e he Iselaelite he ʼu manulele pea mo he ʼu manu ke ina foaki ki te ʼAtua?
Ko ʼihi Iselaelite neʼe ʼi ai tanatou ʼu manulele pea mo tanatou ʼu manu, pea neʼe feala ke nātou mōlagaʼi ia te ʼu meʼa ʼaia. Kae ko te tokolahi ʼo te kau Iselaelite neʼe mole ʼi ai hanatou ʼu manu peʼe ko he ʼu manulele. Pea ko ʼihi neʼe nonofo mamaʼo ʼi Selusalemi, pea neʼe mole feala ke nātou ʼaumai tanatou ʼu manu ki te fale lotu. Koia neʼe ʼōmai te hahaʼi ki te fale lotu pea neʼe nātou totogi ai te ʼu manu peʼe ko te ʼu manulele ʼaē neʼe ʼaoga kia nātou. Kae ko te ʼu tagata faifakatau neʼe nātou fakamaʼua ki te hahaʼi he ʼu totogi ʼe lahi fau. Neʼe nātou kākāʼi te hahaʼi. Tahi ʼaē meʼa, neʼe mole tonu ke nātou faifakatau ʼi te fale lotu.
Ko te meʼa ʼaia ʼaē neʼe tupu ai te ʼita ʼo Sesu. Pea neʼe ina tokatokahi te ʼu laupapa ʼo te ʼu tagata ʼaia pea ina laku ki lalo tanatou ʼu paʼaga. Tahi ʼaē meʼa, neʼe ina fai he huipi ʼaki te kauʼi maea pea ina kapu ki tuʼa te ʼu manu fuli ʼaē neʼe ʼi te fale lotu. Neʼe ina fakatotonu age ki te ʼu tagata ʼaē neʼe nātou fakatau te ʼu lupe: ‘Koutou ʼave ki tuʼa te ʼu manu ʼaenī! Tuku takotou fakaliliu te fale ʼo taku Tāmai, ko he fale faifakatau.’
Ko ʼihi ʼi te ʼu tisipulo ʼa Sesu neʼe nātou kaugā ʼolo mo ia ki te fale lotu ʼi Selusalemi. Neʼe nātou punamaʼuli ʼi tanatou sio ki te meʼa ʼaē neʼe fai e Sesu. Pea neʼe nātou manatuʼi ai te vaega ʼo te Tohi-Tapu ʼaē ʼe ina ʼui ai ʼo ʼuhiga mo te ʼAlo ʼo te ʼAtua: ‘Ko te ʼofa ki te fale ʼo te ʼAtua ʼe kakaha anai ia te ia ohage he afi.’
Lolotoga te nofo ʼa Sesu ʼi Selusalemi ʼo fakatalitali ki te Pāsikate, neʼe lahi te ʼu milakulo ʼaē neʼe ina fai ai. ʼOsi ʼaia, pea mavae ia Sesu ʼi Sutea pea toe liliu ki Kalilea. Kae ʼi tana ʼalu ʼaia, neʼe fakalaka ia ʼi te tisitilike ʼo Samalia. Tou vakaʼi pe koteā te meʼa ʼaē ka hoko.