Tantara 89

Jesosy Nan̈adio Tempoly

JESOSY iô misaora neloko, tsy zen̈y? Hainao ino raha nampaneloko izy? Fôtony lelahy aby tamy tempolin’ny Zan̈ahary ta Jerosalema tao, tia vola loatra. Irô nan̈araraotro olo navy ta Jerosalema, hivavaka amy Zan̈ahary, beky mahazo vola be.

Hitanao zanak’aomby ndreky ôndrikôndriky, ndreky pizin̈y io? Lelahy aby io nivarotro biby aby io tamy tempoly tao. Hainao ino antony? Fôtony Israelita aby io mila biby na vôron̈o atao sôron̈o amian̈a Zan̈ahary.

Tamy lalàn̈an’ny Zan̈ahary, izikoa fa misy Israelita man̈ano adisovan̈a, izy mila man̈ano sôron̈o amian̈a Zan̈ahary. Fa nisy koa fotoan̈a hafa nan̈anaovan-drô sôron̈o biby. Aia ahitan’Israelita vôron̈o ndreky biby atao sôron̈o zen̈y?

Israelita sasany nitarimy vôron̈o ndreky ôndrikôndriky na biby hafa. Irô nahavita nan̈ano sôron̈o. Kanefa, maro tamin’Israelita aby io tsy nanan̈a. Sasany nipetraka lavitry Jerosalema, ke tsy afaka nitaondra biby atao sôron̈o amy tempoly. Ke amy tempoly ao fo olo aby io mivanga biby na vôron̈o ilain-drô. Fa olo aby io tia vola loatra. Irô nan̈araraotro. Nampanongain-drô vidin-draha. Tempolin’ny Zan̈ahary tsy fivaraotan̈a!

Zen̈y nampaneloko Jesosy. Nahaongany latabatra jiaby nandafaosan’olo raha, vola jiaby nirabaraba. Jesosy baka iô nan̈amboatra karavasy tamy tady nandroasany vôron̈o jiaby tamy tempoly tao. Volan̈iny tamy mpivarotro jiaby tao: ‘Aboahanarô an-tany an̈y raha jiaby io! Tran̈on’ny Babako tsy mila atao fitadiavam-bola.’

Sasany tamy mpianatra Jesosy niaraka taminany tamy tempoly ta Jerosalema. Irô tamy zen̈y gaga nahita raha nataon’i Jesosy. Azon-drô onon̈o raha voasoratra an̈aty Baiboly mikasiky Zanaka Zan̈ahary, mivolan̈a kara’ty: ‘Fitiavany tran̈on’ny Zan̈ahary nizelazela tan̈atiny tao, miran̈a môtro.’

Tamy Jesosy navy ta Jerosalema nan̈ano fetin’ny Paska io, nan̈ano fahagagan̈a maro. Tafaran’izen̈y, izy niala Jodia, nimpody ta Galilia. Izy nandalo tamy tanàna man̈odidin̈y Samaria. Ino amy zay raha niboaka tan̈y? Alô zahavatsika.

Jaona 2:13-25; 4:3, 4.