YESU apano akuwoneka kuti atumbile mnope, ngati m’yoyo? Ana akumanyilila ligongo lyakwe atumbile mnope? Lili ligongo lyakuti ŵandu ŵali pa nyumba ja Mlungu ku Yelusalemuŵa ali ŵakutunduka mnope. Akusaka kuti apateje mbiya syapawinji kutyocela kwa ŵandu ŵayice akuno kukulambila Mlungu.

Ana akutuwona tumikambako twa ng’ombe, ngondolo, soni ana akusiwona ngundasyo? Ŵanduŵa akusumicisya yinduyi panyumba jakulambililaji. Ana akumanyilila ligongo lyakwe? Ligongo lyakuti Ayisalayeli akusaka yinyama ni yijuniyi kuti apelece mbopesi kwa Mlungu.

Malamusi ga Mlungu gasalaga kuti naga mundu jwa Ciyisalayeli atesile cakulemwa, akusosekwa kupeleka mbopesi kwa Mlungu. Soni Ayisalayeli ndaŵi sine ŵapelekaga mbopesi sine. Nambo ana sambano Ayisalayeli ŵapataga kwapi yijuni ni yinyama yakuti apelece mbopesi kwa Mlungu?

Ayisalayeli ŵane ŵalangaga yijuni, soni yinyama. M’yoyo ŵakombolekaga kupeleka yeleyi mbopesi kwa Mlungu. Nambo Ayisalayeli ŵane nganalangaga yinyama kapena yijuni. Soni ŵane ŵatamaga kwakutalikangana ni Yelusalemu, m’yoyo yaliji yakusawusya kuti ajigale yinyama yawo kwawula nayo ku nyumba jakulambilila. M’yoyo ŵandu ŵatendaga kusuma yinyama kapena yijuni yaŵayisakaga. Nambo acalumeŵa ŵakatalisyaga mnope yinduyi. Ŵajiŵilaga ŵandu. Nambosoni, nganasosekwaga kusumicisya mkati musyesyenemu mwa nyumba ja Mlungu.

Yesu atumbile ligongo lya yeleyi. Ni sambano jwalakwe akugudubusya matebulo ga ŵanduwo, soni akwasa mbiya syawo. Nambosoni, akupanganya mpici wa ngonji, kaneko akukoposya yinyama yosope m’nyumba jakulambilila. Akwasalila acalume ŵakusumisya ngunda ŵala kuti: ‘Akoposye yeleyi amuno! Akasajitenda nyumba ja Atati ŵangu kuŵa malo gakupatila mbiya syapawinji.’

Ŵakulijiganya ŵa Yesu ŵane ali yimpepe ni jwalakwe pa nyumba jakulambilila ku Yelusalemu kuno. Jemanjaji akusimonga pakuyiwona yakutenda Yesu. Ndaŵi jijojo akukumbucila kuti m’Baibulo mwana maloŵe gakwamba ya Mwanace jwa Mlungu gakuti, ‘Cinonyelo ca pa nyumba ja Mlungu cicikolela mwa jwalakwe mpela moto.’

Yesu pali akuno ku Yelusalemu kutenda nawo Pasaka, akutenda yakusimonjesya yejinji. Kaneko, Yesu akutyoka ku Yudeya nikuwutanda ulendo wakwawula ku Galilaya. Nambo paulendowu, akupitila ku Samaliya. Kwende tulole yayikutendekwa kweleku.