JACH kʼuux u yilaʼal Jesús teʼelaʼ, ¿máasaʼ? ¿A wojel wa baʼaxten? Tumen le máakoʼob yanoʼob tu templo Dios yaan Jerusalenoʼ jach ku binoʼob tu paach ayikʼalil. Jach koʼoj u konkoʼob le baʼaxoʼob kʼaʼabéet tiʼe máakoʼob ku taaloʼob adorar teʼ templooʼ.

¿Táan wa wilik le wakaxoʼob, le tamanoʼob yéetel le palomaʼoboʼ? Teʼ templo ku konaʼaloʼobaʼ. ¿A wojel wa baʼaxten? Tumen kʼaʼabéet baʼalcheʼob yéetel chʼíichʼoʼob tiʼe israelitaʼob utiaʼal u kʼuboʼob tiʼ Diosoʼ.

U ley Dioseʼ kiaʼalik kaʼacheʼ wa utúul israelita ku beetik upʼéel baʼal maʼ maʼalobeʼ, kʼaʼabéet u kʼubik utúul baʼalcheʼ tiʼ Dios. Yaan xan uláakʼ baʼax oʼolal ku kʼaʼabéettal u beetkoʼob lelaʼ. Chéen baʼaleʼ, ¿tuʼux jeʼel u chʼaʼikoʼob baʼalcheʼob yéetel chʼíichʼoʼob utiaʼal u kʼuboʼob tiʼ Dioseʼ?

Yaan israelitaʼobeʼ yaan u yaalakʼoʼob utiaʼal u kʼuboʼob. Baʼaleʼ yaʼabeʼ minaʼan tiʼobiʼ. Uláakʼoʼobeʼ kex yaan u yaalakʼoʼobeʼ maʼ tu páajtal u taaskoʼob teʼ templooʼ tumen jach náach kajaʼanoʼob tiʼ Jerusalén. Le beetkeʼ mambil u beetkoʼob ken kʼuchkoʼobiʼ. Baʼaleʼ le máakoʼobaʼ ku yoklikoʼob u taakʼin le israelitaʼoboʼ tumen jach koʼoj u koonoloʼob. Ku tsʼoʼoleʼ maʼ unaj u koonoloʼob tu templo Diosiʼ.

Lelaʼ letiʼ beet u kʼuuxil Jesús. Le beetik tu walkʼesaj u mesai le taakʼinoʼ ka láaj kʼiʼikʼitpaji. Tu beetaj xan upʼéel u suumil jaatsʼeʼ ka tu jóoʼsaj le baʼalcheʼob teʼ templooʼ. Tiaʼalaj xan tiʼe j-kon palomaʼoboʼ: ¡Luʼseʼexoʼob wayeʼ! Maʼ sutikeʼex u yotoch in Taata u najil koonol.

Le jujuntúul j-tsaypachoʼob tiaʼanoʼob yéetel Jesús teʼ templooʼ, jaʼakʼ u yóoloʼob ka tu yiloʼob baʼax tu beetaj Jesús. Ka túun kʼaʼajtiʼob baʼax kiaʼalik le Biblia yoʼolal u Paal Diosoʼ: In yaabilaj tu yoʼolal a najileʼ tu tʼabaj in wóol.

Le tiaʼan Jesús Jerusalén utiaʼal u kʼiimbesajil le Pascuaoʼ, tu beetaj yaʼab milagroʼob. Ka tsʼoʼokeʼ, Jesuseʼ lukʼ Judeaeʼ ka joʼopʼ u suut Galilea. Baʼaleʼ tséel tu luʼumil Samaria. Koʼox ilik baʼax úuchiʼiʼ.