Gin ki Dako ma i Wang Pii-ni
Ododo 90
Gin ki Dako ma i Wang Pii-ni
YECU ocung ka yweyo i wang it mo i Camaria. Lupwonnyene gucito i boma ka wilo cam. Dako ma Yecu tye ka lok kwede ni obino ka twomo pii. En owaco bote ni: ‘Miya pii amati.’
Man omiyo dako-ni ouro mada. In ingeyo pingo? Ouro pien Yecu obedo Lajudaya, ento en Lacamaria. Dong pol Lujudaya pe gimaro Lucamaria. Pe bene giloko kwedgi! Ento Yecu maro dano mo keken. Pi meno en owaco ni: ‘Ka ingeyo ngat ma tye ka kwayi pii amata-ni, kono ikwaye wek en omi pii ma miyo kwo.’
Dako-ni owaco ni: ‘Ladit, wang pii-ni tut, dok in ipe wa ki gitwomo. Inongo pii man ma miyo kwo-ni ki kwene?’
Yecu otitte ni: ‘Ka imato pii ki i wang pii man orwo pud bineki odoco. Ento pii ma an abimiyo twero weko dano kwo nakanaka.’
Dako-ni owaco ni: ‘Ladit miya pii-ni! Ci orwo dong pe bineka. Dok pe dong abibedo ka bino kany ka twomo pii.
Dako-ni tamo ni Yecu tye ka lok i kom pii kikome. Ento en tye ka lok i kom ada ma mako Lubanga ki ker mere. Ada man tye calo pii ma miyo kwo. Twero miyo kwo ma pe tum bot dano.
Ka kenyo Yecu dong owaco bot dako-ni ni: ‘Cit ilwong cwari ci idwog cen.’
En ogamo ni: ‘An cwara pe.’
Yecu owaco ni: ‘In igamo kakare. Ento in ibedo ki co abic, dok laco ma itye ka bedo kwede kombeddi-ni pe cwari.’
Dako-ni ouro adada, pien lok magi ducu obedo lok ada. Yecu ongeyo jami magi nining? Ada, tye kit meno pien Yecu aye Ngat ma Giciko pire ma Lubanga ooro, dok Lubanga aye miye ngec man. I cawa man lupwonnye pa Yecu gudwogo cen, ci gu-uro pien en tye ka lok ki dako me Camaria.
Wapwonyo gin ango ki i jami magi ducu? Man nyuto ni Yecu ber bot jo me rok ducu. Dok wan bene myero wabed kumeno. Pe myero watam ni jo mogo giraco pien gia ki i rok moni. Yecu mito ni dano ducu gunge ada ma konyo me nongo kwo ma pe tum. Dok wan bene omyero wabed ki miti me konyo dano wek gunge ada.
