JESUH cu Samaria i tikhor pakhat pawng ah aa din. A zultu hna cu rawl cawk ah khua chung ah an kal cang. Jesuh nih bia a ruah lengmang mi nu cu ti than ah a ra. Jesuh nih: ‘Ti din khat in ka pe tuah,’ tiah a ti.

Mah nihcun minu cu a khuaruah a harter ngai. Zeicah ti nan hngal maw? Jesuh cu Judah mi a si i amah cu Samaria mi a si caah a si. Judah mi tampi nihcun Samaria mi cu an duh hna lo. A chawnh hmanh an chawn duh hna lo! Sihmanhsehlaw Jesuh nihcun mi vialte kha a dawt hna. Cucaah: ‘Ti din awk an haltu hi ahodah a si ti kha hei hngal law cu, amah tu hi na hal hnga i nunnak ti kha an pek ko hnga,’ tiah a ti.

Minu nihcun: ‘Bawipa, tikhor cu a thuk i ti thannak thawl zong na ngeih ṭung lo. Cu nunnak ti cu khuazei in dah na hmuh lai?’ tiah a hal.

‘Hi tikhor i ti kha na din ahcun na ti a hal ṭhan lai. Sihmanhsehlaw keimah nih ka pek lai mi ti nihcun mi pakhat kha zungzal nunnak a pek lai,’ tiah Jesuh nih a fianter.

Minu nih: ‘Bawipa, cu ti cu ka pe tuah! Cun ka ti a hal ṭhan bal ti lai lo i, hika zong ah ti than ah ka rat a hau ti lai lo,’ a ti.

Minu nihcun Jesuh cu ti taktak kong a chim rua tiah a ruah. Sihmanhsehlaw Jesuh nih Pathian le a pennak kong he aa tlai mi biatak kong kha a chim mi a si. Cu biatak cu nunnak petu ti bantuk a si. Mi kha zungzal nunnak a pek khawh.

Cutikah Jesuh nih minu cu: ‘Kal law na vapa kha va au law ra ṭhan,’ tiah a ti.

Minu nihcun: ‘Va ka ngei rih lo,’ tiah a leh.

‘Na chim mi cu a hmaan ko. Sihmanhsehlaw va panga na ngei cang i, atu i na um ṭi mi pa zong hi na va a si lo,’ tiah Jesuh nih a ti.

Cu vialte cu a hmaan dih caah minu cu a khuaruah a har. Hi vialte kong cu Jesuh nih zeitindah a hngalh? A si, Jesuh cu Pathian nih ka rak thlah lai tiah bia a kam mipa a si i, cu kong vialte cu Pathian nih a hngalhter mi a si.

Mah lio ahcun Jesuh zultu pawl cu an ra kir ṭhan i, Samaria minu he bia an i ruah caah an khuaruah a har.

Hi vialte thawng in zeidah kan hngalh? Jesuh cu miphun zakip vialte cung ah vel a ngei ti kha a langhter. Kanmah zong cubantuk cu kan si ve awk a si. Mi cheukhat cu cu phun kha phun an si ruang ah an ṭha lo tiah kan ruah hna awk a si lo. Jesuh nihcun, zungzal nunnak ah a hruai mi biatak kha mi vialte nih hngal hna seh ti a duh. Cun kanmah zong nih mi vialte kha biatak hngalh awk ah bawmh kan duh ve hna lai.