JESÚS Samaria neggweburgi dia nagab obunnononiggi. E sabbingandi neggweburse nadmala mas baggega. Ome Jesúsbo sunmaggwissid dina, dii wedaniggi. Jesús ega soge: ‘Anga wis dii gobed be udage’.

Ome geger dagge. ¿Be wisi ibigala? Jesúsdi judío, geb ome dina Samaria ginedi. Ar judíomar, Samaria dorgan nabir dagsurdamala. ¡Ebo bibbisaar sunmagsurdamala! Auggine, Jesúsdi belagwable dulemar sabe. Jesús omeg soge: ‘Ar be wisile doa bes dii egissii, ese be egissamogaled, geb edi beg dii dula, dule imagged beg ugsaled’.

Ome abinsoge: ‘Dummad, dia maddusulid, ar bedi bormo saddebalid. ¿Bia degidde, dii dula, dule imagged be amigosunna?’.

Jesús abinsogded: ‘We dia e dii be gobsale gannar be dii gobbi gudabaloed. Auggine, dii an beg uggoeddi sun nabir dule na sadegu dula gudii imagged’.

‘Dummad’, ome abinsoge, ‘¡we dii be anga wis udage! Adi bar an dii gobbi iddogosulid. Bar an wes dii wedagosuli’.

Ome dina binsae Jesús dii sunnadgi sunmagsiye. Auggine, Jesúsdi sunmagsii igar nabbiragwad Babdummad siggi maidgi geb e reino gine, ar we ibmarmala dii, dula dule imaggedyob gue. Nabir dule sadegu dula gudii imagged.

Jesús emisgi omeg soged: ‘Be suis be gornae geb be gannar dagbaloe’.

‘An sui sadde’, ome soge.

Jesús ega soge: ‘Inniggi be sogsa, auggine, be waladdar sui niggusad, degine, massered emisgwa ebo be gudiidi, be sui sulid’.

Ome geger iddoge, ar bela we ibmar nabirid. ¿Igi Jesús nabir we ibmar wisgusa? Ar Jesúsdi dule Babdummad Barmidagoye sogsadi, degine, Babdummad bela we ibmar ega sogsad. Emisgine Jesús sabbingan gannar nonimala, geb geger Jesús dagmala ibigala ome Samaria ginedbo sunmagsii.

¿Ibu we igargi anmar durdagge? Jesús dule nued dae bela dulemar neggwebur baidbaid ginmaladgi. Anmar deyob gued abelemoga; mer anmar dulemargi binsao, we anmar dule sulidbali, dule isganaye. Jesús abeged belagwable dulemar babigar sunsoged durdagmaladi, nabir sadegu dula gudii dule imagged. Anmar anba emar bendagbie gumogadi, we ibmar durdagmalaga.